1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Matangazo
Matangazo
Matangazo
default

Taarifa ya Habari za Ulimwengu kutoka Idhaa ya Kiswahili ya DW

Habari | 25.10.2021 | 13:00

Jeshi la Sudan lachukua madaraka, viongozi wa kiraia wakamatwa

Jeshi la Sudan limenyakuwa madaraka kwa njia ya mapinduzi na kuwatia kizuizini viongozi wa kiraia wa serikali ya mpito. Jenerali Abdel Fattah al-Burhan, kiongozi wa baraza tawala la kijeshi lililokuwa likishirikiana na wanasiasa wa kiraia ameyatangaza hayo mchana wa leo, akidai kuwa hali iliyokuwa ikishuhudiwa nchini humo ilikuwa ni kitisho kwa ndoto ya vijana wanaotaka mabadiliko. Mwanajeshi huyo aliyelihutubia taifa kwa njia ya televisheni, amesema katika juhudi za kuweka mkondo sahihi wa mageuzi wanatangaza utawala wa hali ya dharura katika maeneo yote ya nchi na kulisimamisha kazi baraza la utawala wa mpito miongoni mwa hatua nyingine. Jenerali Burhan amesema kwa muda mfupi mambo yatakuwa yamewekwa sawa. Muungano wa vyama vya upinzani nchini Sudan umelaani hatua hiyo ya jeshi, na umewataka raia kuikataa kwa kufanya maandamano ya amani. Limetaka pia viongozi wote wa kiraia waliokamatwa waachiwe huru mara moja.

Dunia yalaani mapinduzi ya kijeshi Sudan

Viongozi wengi wa dunia wamelaani mapinduzi ya kijeshi nchini Sudan, yaliyoiondoa madarakani serikali ya mpito na kumtia kizuizini waziri mkuu Abdalla Hamdok na viongozi wengine wa kiraia. Rais wa kamisheni ya Umoja wa Afrika Mousa Fakki Mahamat amesema umoja huo umesikitishwa na hali inayoendelea nchini humo, na umehimiza mazungumzo ya haraka kati ya wanajeshi na raia. Mjumbe wa Marekani kuhusu Upembe wa Afrika Jeffrey Feltman amesema hatua hiyo ya jeshi inakwenda kinyume na matarajio ya kidemokrasia ya raia wa Sudan. Ujerumani kupitia waziri wake wa mambo ya nje Heiko Maas imesema jaribio la mapinduzi nchini Sudan ni hatua inayoleta wasiwasi, na kuwataka wote wenye dhamana ya usalama nchini humo kuhakikisha kuwa mchakato wa kuelekea demokrasia hautatizwi. Umoja wa mataifa ya kiarabu nao umetaka pande zote nchini Sudan kuendelea kuheshimu makubaliano ya kugawana madaraka ya Agosti mwaka 2019.

Viwango vya hewa ya ukaa angani vyaendelea kupanda-UN

Kiasi cha gesi ya ukaa katika anga la dunia kilipanda mwaka jana na kufika katika viwango vipya, licha ya kusitishwa kwa baadhi ya shughuli za kiuchumi kutokana na vizuizi vya janga la corona. Hayo ni kwa mujibu wa Kitengo cha hali ya hewa katika Umoja wa Mataifa katika ripoti yake mpya iliyochapishwa leo. Ripoti hiyo imeonyesha vile vile kupanda kwa viwango vya aina nyingine ya hewa mbaya kwa mazingira, kama Methani na Naitrojeni Oksaidi katika kipindi cha miaka miwili iliyopita. Umoja wa Mataifa umeonya katika ripoti hiyo, kuwa hali hiyo inakwamisha vibaya azma ya kufikiwa kwa malengo ya kudhibiti ongezeko la joto duniani kulingana na makubaliano ya Paris ya mwaka 2015. Haya yanajiri siku chache kabla ya mkutano wa kilele kuhusu mabadiliko ya tabianchi utakaofanyika mjini Glasgow, Scotland kwa takribani wiki mbili kuanzia Jumapili ijayo.

Mjerumani mfuasi wa IS akutwa na hatia ya kumuuwa msichana wa Kiyazidi

Mahakama moja kusini mashariki mwa Ujerumani imemhukumu kifungo cha miaka 10 jela, mwanamke Mjerumani aliyejiunga na kundi linalojiita Dola la Kiislamu, kwa kumtelekeza msichana wa miaka 5 kutoka jamii ya Yazidi aliyekuwa akimshikilia kama mtumwa. Jaji kiongozi wa mahakama hiyo ya mjini Munich, Reinhold Baier amesema mwanamke huyo, Jennifer Wenisch mwenye umri wa miaka 30 alikutwa na hatia ya uhalifu dhidi ya ubinadamu na kumtumikisha mtu kama mtumwa. Mahakama hiyo imepata ushahidi kuwa Bi Wenisch na mme wake walimnunua mwanamke wa Kiyazidi na mtoto wake, ili wawatumie kama watumwa katika eneo lililokuwa chini ya uthibiti wa IS nchini Irak. Baadaye mtoto huyo aliachwa afe kwa kiu akifungiwa nje kwenye jua kali, kama adhabu ya kukojoa kitandani. Mme wa Jennifer Wenisch, Taha al-Jumailly ambaye ni raia wa Irak anakabiliwa na kesi nyingine mjini Frankfurt, hukumu yake ikitarajiwa mwezi Novemba.

Zaidi ya nusu ya Waafghani wanakabiliwa na janga kubwa la njaa-UN

Waafghani zaidi ya milioni 22 watakabiliwa na uhaba mkubwa wa chakula katika msimu ujao wa baridi, katika kile ambacho Umoja wa Mataifa unakiita, mzozo mbaya zaidi wa kibinadamu kuwahi kuifika nchi hiyo isio na uthabiti. Katika ripoti yake iliyochapishwa leo Jumatatu, Umoja wa Mataifa umesema mamilioni ya Waafghani watachagua kati ya kuihama nchi na kufa kwa njaa, kama msaada wa uokozi hautawasili kwa haraka. Mkuu wa shirika la chakula ulimwenguni WFP David Beasley amesema tayari janga nchini Afghanistan ni kubwa zaidi kuliko la Yemen na Syria, na baya zaidi kuliko wakati wowote ule katika Jamhuri ya Kidemokrasia ya Kongo. Taarifa ya pamoja ya WFP na shirika la dunia la Chakula na Kilimo, FAO imesema kati ya kila Waafghani wawili, mmoja anakabiliwa na mzozo wa chakula, wengine mzozo huo ukiwa katika kiwango cha dharura.

China ni nchi ya amani na kuheshimu sheria-Xi Jinping

Rais wa China Xi Jinping amesema nchi yake daima itazingatia amani na kuheshimu sheria za kimataifa, na kusimama kidete dhidi ya siasa za mabavu na ubabe. Hayo ameyasema katika hotuba ya kuadhimisha miaka 50 tangu nchi yake iliporejea katika Umoja wa Mataifa. Kauli ya Xi imetolewa wakati Marekani na baadhi ya nchi nyingine zikiituhumu China kutunisha misuli katika masuala ya kidunia. Mwezi huu Taiwan imesema mvutano baina yake na China uko katika kiwango kikubwa zaidi kwa muda wa miaka 40, kukiwepo hofu kuwa jirani yake huyo mwenye nguvu anaweza kujaribu kuitwaa kwa nguvu za kijeshi Taiwan. Mnamo miaka ya hivi karibuni China pia imekuwa ikizungumza kwa nguvu zaidi katika mzozo wa mpaka baina yake na India katika milima ya Himalaya, na imevutana vikali na jirani zake wa kusini kuhusu mpaka katika Bahari ya China Kusini.

WHO yatoa mwito mwingine kwa nchi tajiri kusaidia upatikanaji wa chanjo

Shirika la Afya Ulimwenguni, WHO limeitolea mwito Ujerumani na nchi nyingine zenye uwezo, kuzipa kipaumbele nchi zenye mahitaji makubwa ya chanjo ya Covid-19. Akizungumza katika mkutano wa kilele wa shirika hilo mjini Berlin, mkurugenzi wake mkuu Tedros Adhanom Ghebreyesus amekumbusha juu ya lengo la shirika hilo, la kuhakikisha kuwa kila nchi duniani imeweza kutoa chanjo kwa angalau asilimia 40 ya watu wake ifikapo mwishoni mwa mwaka huu. Tedros ametoa onyo, akisema hakuna nchi yoyote inayoweza kulishinda janga la virusi vya corona pekee yake. Amesema hadi leo anapata taarifa za vifo takribani 50 elfu vitokanavyo na Covid-19 kila wiki, akiongeza kuwa hiyo ni ishara tosha kuwa janga hilo bado lipo.

Sikiliza sauti 09:48