Confederations Cup; Maandamano yatia doa

Brazil na Italia zinapambana kuwaepuka mabingwa wa dunia Uhispania katika nusu fainali.

Matumaini ya Japan na Mexico katika Confederations Cup yafikia ukingoni , na katika tennis uwanja utayari kwa mpambano wa kuwania taji la Wimbledon , kwa hayo na mengineyo huyu hapa Sekione Kitojo.

Rais wa Brazil Dilma Rousseff ameitisha kikao cha dharura cha baraza la mawaziri jana Ijumaa(20.06.2013), siku moja baada ya mtu mmoja kuuwawa katika maandamano na watu wanaokadiriwa kufikia milioni1 na 225,000 kuingia mitaani nchi nzima wakidai huduma bora za umma.

Maandamano hayo makubwa , ambayo katika baadhi ya nyakati yalifikia kuwa ni mapambano ya kutumia nguvu, yanafanyika wakati Brazil ambayo watu wake wanafahamika kuwa na wazimu wa soka ni mwenyeji wa mashindano makubwa ya kombe la mabara, ambapo timu za mataifa kutoka sehemu mbali mbali za dunia zinashiriki mashindano hayo, ikiwa ni majaribio ya fainali za kombe la dunia mwakani nchini humo.

Wabrazil wakasirika

Wabrazil wengi wamekasirishwa na matayarisho ya gharama kwa ajili ya michezo hiyo ya kombe la dunia na michezo ya Olimpiki ya majira ya joto mwaka 2016.

Waandamanaji kadha wameendelea kubaki nje ya viwanja vinavyofanyika mashindano hayo , na maandamano makubwa kabisa yanapangwa kufanyika Juni 30 katika uwanja maarufu wa Maracana mjini Rio de Janeiro katika siku ya fainali ya kombe la Confederations.

Wakati huo huo vigogo wa soka duniani Brazil pamoja na Italia watapambana kuwaepuka mabingwa wa dunia Hispania wakati watakapokutana katika mchezo wa mwisho wa duru ya makundi katika kombe la Cofederations mjini Salvador leo jioni(22.06.2013).

Mchezo huo wa kundi A unazikutanisha timu hizo mbili zenye mafanikio makubwa katika historia ya kombe la dunia, wakati wenyeji Brazil wanashikilia rekodi ya kulinyakua kombe la dunia mara tano wakati Italia imelinyakua mara nne.

Timu zote zina points sita baada ya ushindi mara mbili, lakini timu itakayomaliza ikiwa ya kwanza katika kundi hilo huenda ikaiepuka Uhispania ambayo ina nafasi kubwa ya kushika nafasi ya kwanza katika kundi B.

Mratibu wa masuala ya ufundi katika timu ya Brazil Carlos Alberto Pereira amesema kocha Luiz Felipe Scolari huenda asiwatumie wachezaji ambao hawako fit ili kuweza kuwapata kwa ajili ya mchezo wa nusu fainali.

Baadhi ya wachezaji katika kikosi cha Scolari ni majeruhi , hususan baada ya mchezaji wa kati Paulihno kupata maumivu katika kifundo cha mguu, na mlinzi wa kati David Luiz kupata maumivu ya pua, katika mchezo dhidi ya Mexico.

Nyota wa Italia Andrea Pirlo atakuwa nje ya uwanja leo kwa kuwa ana maumivu ya paja. Pamoja na Pirlo mchezaji Daniele De Rossi hatakuwamo katika kikosi cha kocha Cesare Prandelli kutokana kupata kadi ya pili ya njano. Brazil inahitaji sare kushika nafasi ya kwanza na kuiepuka Uhispania katika nusu fainali.

Matumaini yaota mbawa

Japan na Mexico ziliingia katika mashindano haya kwa matumaini makubwa ya kusonga mbele, lakini matumaini hayo yameopta mbawa chini ya wiki moja baada ya michuano hiyo kuanza baada ya timu hizo kushindwa kupata ushindi katika michezo yao dhidi ya wenyeji Brazil ama Italia.

Timu hizo hata hivyo zinakutana katika mchezo wa kutimiza wajibu leo mjini Belo Horizonte.

Tennis

Na mashabiki wa mchezo wa tennis watapata nafasi ya kushuhudia nyota wa mchezo huo wakichuana katika kuwania taji maarufu la mchezo huo la Wimbledon kuanzia kesho Jumapili.

Bingwa mara saba wa taji hilo Roger Federer huenda akapambana na hasimu wake mkubwa Rafael Nadal katika robo fainali ya michuano hiyo ya Grand Slam ya Wimbledon.

Federer na Nadal wamepangwa katika kundi moja na Andy Murray pia yumo katika kundi hilo na anaweza kukutana na Nadal ama Federer katika nusu fainali.

Mwandishi: Sekione Kitojo / ape / dpae / rtre

Mhariri:Abdul-Rahman Mohammed