Беларускія ўлады асцерагаюцца фотакарэспандэнтаў | Беларусь и белорусы: новости и аналитика | DW | 03.03.2006
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Беларусь

Беларускія ўлады асцерагаюцца фотакарэспандэнтаў

Аб гэты сведчаць паводзіны супрацоўнікаў спецслужб падчас учорашняга затрымання кандыдата ў прэзідэнты А. Казуліна, а таксама падчас сустрэчы з выбаршчыкамі адзінага кандыдата ад дэмакратычных сіл А. Мілінкевіча

default

Учора ў менскім аэрапорту былі затрыманыя трое актывістаў украінскага руху "Пара" і шэсць украінскіх журналістаў трох тэлеканалаў "Тоніс", "1+1" і "Пятага каналу". Чалавек, які прадставіўся кіраўніком аддзела па барацьбе з тэрарызмам, паведаміў актывістам "Пары", што іх уезд на тэрыторыю Беларусі "непажаданы". Актывістаў дэпартавалі ў Кіеў, а ўкраінскім журналістам дазволілі заехаць у краіну, але без тэлекамер.

Аб тым, што беларускія ўлады асцерагаюцца менавіта аператараў і фотакарэспандэнтаў, сведчаць паводзіны супрацоўнікаў спецслужб падчас учорашняга затрымання кандыдата ў прэзідэнты Аляксандра Казуліна, а таксама падчас сустрэчы з выбаршчыкамі адзінага кандыдата ад дэмакратычных сіл Аляксандра Мілінкевіча.

Нагадаю, што разам з Казуліным былі затрыманыя фотакарэспандэнты агенцтваў АР і Reuters Сяргей Грыц і Васіль Федосенка, а таксама іх калегі з "Белгазеты" і штотыднёвіка "Наша ніва" Зміцер Брушко і Юлія Дарашкевіч. Яны сталі сведкамі абстрэлу машыны побач Кастрычніцкага РАЎС, куды быў дастаўлены Казулін і сябры яго ініцыятыўнай групы. Па словах Юліі Дарашкевіч, людзі ў цывільным кінуліся да іх і сталі зрываць з шый фотакамеры. Убачыўшы ў іх руках зброю, журналісты пагадзіліся прайсці ў аддзяленне. Фотакораў адпусцілі, калі упэўніліся што кадры абстрэлу машыны не зафіксаваныя на фота. З фотакамеры Васіля Федосенкі былі знішчаны кадры, якія ен зрабіў на пачатку дня.

Як паведамілі сведкі, ад палкоўніка Паўлічэнкі пацярпеў тэлеаператар агенцтва "Reuters" Дзмітры Мадорскі: журналіста павалілі на зямлю і білі нагамі, рассекшы броў.

Больш за ўсё дасталася карэспандэнту "Камсамольскай праўды ў Беларусі" Алегу Улевічу, які быў жорстка збіты. Зараз ён находзіцца ў шпіталі з дыягназам "чэрапна-мазгавая траўма" і "пералом касцей носу". Лекары не рэкамендуюць Алегу размаўляць.

Як распавяла НХ яго сястра Вольга, людзі ў цывільным накінуліся на Алега, калі ён фатаграфаваў жонку Казуліна Ірыну. Журналісту нанеслі моцны ўдар у твар, і з гэтага моманту ён нічога не памятае. Учора ўвечар да Алега Улевича прыходзілі апранутыя у цывільнае начальнікі аддзелаў інфармацыі і грамадскіх сувязяў МУС - палкоўнік Генадзь Клепча і ГУЎС маёр Алег Слепчанка. Яны прапанавалі калегам Алега якія наведвалі яго у шпіталі, выйсці з палаты, а потым распытвалі журналіста, ці памятае ён, хто яго біў. Пераканаўшыся, што не памятае, Клепча і Слепчанка папыталі прабачэнні за дзеянні сваіх калегаў і задалі журналісту пытанне: "А, можа быць, Вы стукнуліся аб плот?"

У 2 гадзіны ночы да Алега прыйшлі супрацоўнікі Маскоўскага РАЎС і амаль што прадыктавалі лаканічны тэкст заявы ў міліцыю аб тым, што здарылася. Міліцэйскія начальнікі, гаворыць Вольга Улевіч, мабыць, зразумелі, што інцыдэнт атрымаў шырокі розгалас.