د دوو ښځینه فعالانو د خوشې کولو غوښتنه
۱۴۰۲ مهر ۷, جمعه
اعلان
طالبانو دوې ورځې وړاندې د ښځو د حقونو فعاله ژولیا پارسي د هغې له کوره نېولې ده.
سرچینو دویچه ویله ته منلې چې نوموړې د چهارشنبې په ورځ نېول شوې او ترهغې وړاندې یې زوی نېول شوی و.
دغه راز، ويل کيږي چې د افغانستان معترض ښځو د خودجوش خوځښت په نوم د دغه جنبش یوه بلې غړې ندا پرواني هم نېول شوې.
په افغانستان کې پر بشري وضعیت د ملګرو ملتونو ځانګړي رپوټ ورکوونکي ریچارډ بینیټ د دغو ښځېنه فعالانو په خپلسرې نېولو اندېښنه ښودلې.
هغه پر خپله ایکس پاڼه لیکلي: «زه د بشري حقونو ښځېنه فعالانو ژولیا پارسي، ندا پرواني او د هغوی د کورنیو د غړو په خپلسري نېولو باندي جدي اندېښمن یم.»
ښاغلي بېنیټ پر طالبانو غږ کړی دی چې د ښځینه حقونو دغه فعالانو دې سملاسي او له کوم قید و شرط پرته خوشې کړي. دغه راز باید د هغوی د خوندېتوب تضمین ورکړل شي.