Шолц бара од Индија јасен став за војната во Украина

Германскиот канцелар Олаф Шолц бара од Индија да се изјасни околу руската инвазија на Украина. „Светот страна поради оваа агресија“, изјави Шолц по средбата во Њу Делхи со индискиот премиер Нарендра Моди. Војната е „голема катастрофа“, а Русија го прекрши меѓународното начело дека „нема поместување граници со насилство“, изјави германскиот канцелар. „Оттука, многу е важно и во Обединетите нации да имаме сосема јасни заклучоци во врска со оваа тема“, нагласи Шолц.

Индија е зависна од Русија особено во сферата на енергијата и вооружувањето. Освен тоа, Њу Делхи купува евтина нафта од Русија, образлагајќи дека има потреба од евтина нафта за бројното население, кое во голем дел е сиромашно.

Индија досега ја нема осудено руската инвазија на Украина и не ги поддржува западните санкции. Според индискиот премиер Нарендра Моди, целта на Индија уште од почетокот на конфликтот била негово решение „преку дијалог и дипломатија“. „Индија е подготвена да даде придонес за сите мировни разговори“, потенцираше Моди.

Германскиот канцелар Олаф Шолц допатува во Индија со единаесетчлена економска делегација, чиј дел се и претставници на компании како Сименс, ТисенКруп, САП и Германска пошта. Според Шолц, во Индија се активни 1800 германски компании. Канцеларот во Њу Делхи вети дека ќе работи на брзо склучување на планираниот договор за слободна трговија меѓу ЕУ и Индија и го истакна потенцијалот за соработка во областа на обновливите извори на енергија и размена на стручњаци.

Индискиот премиер Моди посочи дека двете страни веќе имаат формирано партнерство во областа на зелениот и одржлив развој. И двете страни сакаа да ги зголемат своите напори во борбата против климатските промени.

Друга важна област е „безбедносната и одбранбената соработка“, рече индискиот премиер. Таа би можела „да стане важен столб на нашето партнерство“. Двете страни тука би можеле да го ослободат „неискористениот потенцијал“, смета Моди.