Германија со попуст за гориво и кризна премија до 1.000 евра

Бундестагот официјално го одобри воведувањето на попуст за гориво и даночно ослободена еднократна премија за олеснување на финансискиот товар врз граѓаните. Со одлуката, од 1 мај се намалуваат даноците на бензинот и дизелот за околу 17 центи по литар. Mерката e потврдена денеска и од Бундесратот.

Привремено поевтинување на горивата од мај до јуни

Со усвоениот пакет, даноците на енергенсите ќе бидат намалени од почетокот на мај до крајот на јуни. Целта е да се ублажи наглиот раст на цените на горивата, кој започна кон крајот на февруари со избувнувањето на војната со Иран. И покрај повременото намалување, цените и натаму остануваат значително повисоки во споредба со периодот пред конфликтот.

Намалувањето на енергетските даноци  дополнително беше одобрено и од Бундесратот на вонредна седница. Германската држава проценува дека оваа мерка ќе ја чини околу 1,6 милијарди евра.

Раст на цените на нафтата и реакција на владата

Во средината на април, врвот на црвено-црната коалиција  договори привремено даночно олеснување за возачите. Германскиот канцелар  Фридрих Мерц   (ЦДУ) изјави дека мерката брзо ќе ја подобри состојбата за граѓаните и компаниите, особено за оние кои поради работни обврски секојдневно користат автомобил.

За просечен возач, попустот во период од два месеца ќе значи заштеда од неколку десетици евра.

Опозицијата повторно остро го критикуваше попустот на горивото за време на дебатата во Бундестагот. „Овој закон е едноставно лудост“,  истакна Андреас Одреч, заменик-лидер на парламентарната група на Зелените. Керозинот е оскуден, цените на бензинот и дизелот драстично се зголемија, „и во оваа ситуација, во оваа тешка ситуација, воведувате закон што дополнително ќе ја поттикне потрошувачката на фосилни горива“.

Многу економисти изразија слични критики. „Од моја перспектива, попустот на горивото не е соодветен одговор на моменталната ситуација“, изјави Томас Пулс од Германскиот економски институт за „Рајнише пост“. Постои глобално „недостаток на нафта и дизел“, затоа потрошувачката мора да се намали. Пратеникот на АфД, Кеј Готшалк, изјави пред гласањето: „Ќе го одобриме овој закон со тешко срце, но ќе го одобриме“. Тој го опиша олеснувањето како само „капка во морето“ што ќе истече токму на време за летните одмори. Дорис Ахелвилм од Левичарската партија го критикуваше фактот дека намалувањето на данокот на енергија веројатно „делумно ќе заврши кај компаниите“.

Цените на нафтата значително пораснаа поради блокадата на Ормускиот Теснец – клучна поморска рута за светската трговија со нафта. Според податоците на АДАЦ, на национално ниво, во четвртокот просечната цена на бензинот „Супер Е10“ изнесувала 2,074 евра по литар, додека дизелот достигнал 2,150 евра. Тоа е за околу 30 до 40 центи повеќе во споредба со периодот пред започнувањето на војната.

Отворен пат за премија до 1.000 евра

Покрај  попустот за гориво,   Бундестагот го отвори патот и за воведување на планираната даночно ослободена премија за растоварување на работниците, во износ до 1.000 евра. Предлогот го поддржаа пратениците од Унијата и СПД, кои ја сочинуваат владејачката коалиција. Против гласаа АфД и Левицата, додека Зелените беа воздржани.

И оваа мерка сè уште треба да добие зелено светло од Бундесратот, а гласањето е закажано за 8 мај.

Компаниите ќе можат да им ја исплатат премијата на своите вработени најдоцна до 30 јуни 2027 година. За работодавачите, исплатата ќе биде признаена како трошок во работењето, а за вработените – целосно ослободена од данок.

Сепак, премијата не е задолжителна, поради што засега не е познато колкав број компании ќе се вклучат, имајќи ја предвид сложената економска состојба. Според проценките на Унијата и СПД, мерката ќе чини најмалку 2,8 милијарди евра, од кои околу 1,1 милијарда ќе паднат на товар на  сојузниот буџет.