Лекарите во Берлин открија индиции дека Навални бил отруен
24 август 2020
Од болницата „Шарите“ во Берлин соопштија дека се уште не знаат со каков отров точно е затруен Алексеј Навални, но претпоставуваат дека супстанцата дошла од групата на холинестеразни инхибитори, хемиска материја која го спречува разградувањето на одредени неуротрансмитери.
Иако здравствената состојба на 44-годишниот Навални е сериозна, нема акутна опасност за неговиот живот, изјави портпарол на болницата. Според неа, прогнозата останува несигурна, а долгорочните последици, особено на невролошкиот систем, не можат да се исклучат во оваа фаза.
На Навални му се слоши на лет од градот Томск кон Москва во четвртокот. Во саботата беше префрлен во Германија на третман во водечката болница во Берлин- „Шарите“.
Тој е во кома по првичниот третман во болницата во Омск, каде лекарите најпрво не се согласуваа да биде пренесен во странство, за на крајот, да попуштат.
Болничките анализи ги потврдуваат тврдењата на тимот на Навални, кои посочуваа на труење како причина за нарушувањето на неговото здравје од самиот почеток. Според соработници на опозиционерот, тој пиел чај на аеродромот во Томск кој најверојатно бил затруен.
Во болницата во Омск тврдеа дека нема никакви докази за намерно труење и наведоа дека Навални веројатно паднал во кома поради низок шеќер во крвта.
„Ние му го спасивме животот. Немаше никакво надворешно влијание врз негата на пациентот и не можеше ниту да има“, изјави главниот лекар на болницата во Омск, Александер Мураховски.
Навални е лидер на опозицијата против рускиот претседател Владимир Путин, и организатор на повеќе серии протести против долгогодишниот моќник, кого го обвинува за одржување на корумпираниот систем.