Катимерини: Седум точки кои во целост мора да се прифатат или одбијат | Северна Македонија | DW | 26.02.2018
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Северна Македонија

Катимерини: Седум точки кои во целост мора да се прифатат или одбијат

Грчкиот весник Катимерини јавува дека предлог договорот за решавање на спорот за името, кој деновиве го разгледал грчкиот премиер Ципрас содржи седум точки. Македонија порача оти за идентитетот не може да се преговара.

Влијателниот грчки весник Катимерини денеска под насловот „Предлог договор во седум точки“ објави текст за тоа какво решение Грција предлага за решавање на спорот со Македонија околу нејзиното име и текстот е илустриран со фотографија на македонски работници кои туркаат табла со натпис „Автопат Александар Македонски“.

Премиерот на Грција, Алексис Ципрас, изминативе денови го разгледал предлог договорот за решавање на спорот со Македонија кој содржи сеопфатни одговори на сите специфични прашања за односот меѓу двете земји, а за Македонија патот кон меѓународните организации, пишува весникот повикувајќи се на информирани извори.

Изворите укажуваат на тоа оти грчкиот предлог може да биде само во целост прифатен или одбиен, односно дека нема да се преговара за кое било од одделните прашања, додека македонскиот премиер, Зоран Заев, неодамна изјави оти има приближување на ставовите за 3 од 7 точки од предлогот.

Повеќе на темата:

-Заев за Дер Шпигел: име без превод е неприфатливо

-Заев: идентитетот не е тема во ниту една точка од преговорите

-Заев: приближување со Грција за „лесните“ прашања

Ципрас и неговиот министер за надворешни работи, Никос Коѕијас, во изминатите две недели имаа чести контакти со колегите во Скопје, и со европските партнери, додава весникот. Критична точка е, укажува „Катимерини“, тоа што „во Скопје се верува дека само се преговара за името.

Меѓутоа, предлогот на Ципрас во 7 точки се однесува прво на името, второ е „обемот на користење на името“, трет е јазикот, четврт е „идентитетот“, петто е „комерцијалната употреба“ на името, шесто и седмо се кратенки и акроними“. 

Македонија веќе порача оти за идентитетот и јазикот не може да се преговара, потсетува весникот. кој додава дека двете страни изгледа во целост се согласуваат само околу рокот за подготовка на решението, односно оти разработувањето на поединечните точки да заврши најдоцна до средината на април.

Атина порачува дека не прифаќа „саламизација“- разделување на целиот предлог на одделни, посебни „слоеви“, пишува „Катимерини“.

Пример на она што Атина не го прифаќа е примена на трговскиот стандард ИСО 3166-1 на Меѓународната организација за стандардизација (ИСО), со кој се утврдени две кратенки за Македонија- МК и МКД кои „директно укажуваат на името Македонија“, пишува весникот, додавајќи оти постои „силен отпор на БЈРМ“ тоа да се промени бидејќи тоа би донело големи промени, особено во извозот на вино.

Постојат и некои детали, продолжува Катимерини, како што е државната химна на Македонија, која содржи некои иредентистички референци, а ги содржи и имињата на сите кои Славомакедонците ги сметаат за историски личности, без референци на аналогно присуство на албанската заедница во БЈРМ.

Химната е секундарно прашање за преговорите, пишува атинскиот весник, но не и државјанството, бидејќи тоа би можело да доведе до пропаст на преговорите, зашто по барање на Грција, Македонија би требало да покрене промена на сите лични документи- лични карти, пасоши, возачки дозволи.

Како симболичен потег за подобрување на атмосферата, Катимерини наведува дека најверојатно неделава се очекува доаѓање на грчкиот министер за надворешни работи Коѕијас во Скопје и тоа со државен авион, што би бил прв таков лет по повеќе од 12 години. Тоа беше така исклучиво поради тоа што скопскиот аеродром до неодамна, како и главниот автопат во Македонија, го носеше името „Александар Македонски“.

Kако сличности со минатото опасни за судбината на потенцијалното решение, Катимерини го наведува делувањето на раководството на Македонија кон странство, односно состаноците на премиерот Заев со германската канцеларка Ангела Меркел и со претседателот на Турција, Реџеп Tаип Ердоган и низата контакти на шефот на дипломатијата Никола Димитров во Европа со cел претставување на македонските ставови и посебно тврдењата за флексибилност на Скопје.

Во странство на Заев му помага тоа што имиџот му е во целосен контраст со оној на претходникот Никола Груевски, кој беше стигматизиран во Западна Европа како националист. А на Заев му помага уште и насекаде видливата стратегија на комуникација- оtстранувањето на статуи и сообраќајни знаци со називи на кои се спротиставува Грција, заклучува Катимерини.

 

DW.COM

Поврзана содржина

Реклама