Yarjejeniya kan shirin nukiliyar Iran

Kantomar harkokin waje ta kungiyar kasashen Turai ta EU Federica Mogherini ce ta ambata hakan a birnin Lausanne na kasar Switzerland bayan kammala kaiwa ga wannan gaba, inda ta ke cewar hakan babban cigaba ne kuma daga nan zuwa watan Yunin da ke tafe ne za a karkare komai.

Shugaban Amirka Barack Obama ya jinjinawa wannan matsayi da aka kai, inda ya ke cewar Amirka da kawayenta da kuma kasar ta Iran sun fahimtar juna da ke ciki da dimbin tarihi.

Ita kuwa Isra'ila cewa ta yi tana adawa da wannan matsaya da aka cimma inda firaministan kasar Benjamin Netanyahu ya ce zai kira wani taro na majalisar ministocin kasar don tattaunawa kan lamarin.