Siriya: Likita mai azabtar da mutane
February 3, 2022
Likitan mai suna Alaa Musa dan shekaru 35 ya isa Jamus tun a shekara ta 2015, a matsayin ma'aikaci ba dan gudun hijira ba. Tun lokacin da ya shiga Jamus din yake yin aiki a cikin asibitoci dabam-dabam har zuwa lokacin da aka kama shi a cikin watan Yuni na shekara ta 2020, inda a yanzu haka zai fuskanci hukunci a Jamus din. A kasarsa Siriya dai, ana girmama likitoci kan irin gundunmawar da suke bayarwa. Sai dai wasu likitocin ana amfanin da su wajen azabtar da mutane musammun masu adawa da gwamnatin Shugaba Bashar al-Assad.
Karin Bayani:Sharhi kan shekaru 20 na shugabancin Assad
Ana dai tuhumar Alaa Musa da laifuka 18 na azabatarwa da kisa ta hanyar yin alura ga wani fursuna yayin da yake aiki a wani asibitin sojoji a garin Homs a shekara ta 2011, inda nan ne tungar 'yan adawa. Daga bayanan da aka tattara na lokacin da yake Siriya, likitan ya rika musgunawa dukkan wadanda aka ba shi umurni a kansu. A wani bincike da Farfeser Houssan al Nahhas da shi ma ya kasance likita wanda kuma ya fuskancin azabatarwa a Siriya, ya ce likitocin na da dabaru na azabatarwa wanda ko mutum ya mutu ba a gane cewar an azabatar da shi.
Ba wai a Siriya kawai ne ake samun wannan al'amari na azbatarwar likitoci ba. A wani rahoto da ta fitar, kungiyar kare hakkin dan Adam ta Amnesty Intrnational ta bayyana kasashe 140 inda likitocin ke azabtarwa. A Jamus ma lokacin gwamnatin 'yan Nazi, likitocin sun taimaka wajen aikata kisa ta hanyar azabtarwa. Daya daga cikinsu shi ne likita Josef Mengele da ake wa lakabi da mala'ikan mutuwa, wanda ya rika fesawa fursuna iskar gas mai guba.
Karin Bayani: Yaki ya sake haddasa mutuwar fararan hula a idlib
Kusan rabin karni kenan dai, kungiyar likitoci ta duniya take yin adawa da azbatarwa ta hanyar amfani da likitoci wanda ta yi haramci a kai a taron birnin Tokyo da aka yi a 1995. Sai dai abin takaici har kawo yanzu a cikin kasashen da ake bin tsarin dimukuradiyya, ana yin amfanin da azabatarwar litkitocin. Misali a Amirka, akan yi amfani da azabtarwar domin yaki da ta'addanci. Gidajen Fursunoni kamar Gwatanamo da Abu Ghraib, duk ba su fita daga cikin wannan tsarin ba.