Sojoji sun dukufa don ganin bayan rikicin Zamfara

Darururwan mutane ne dai suka yi asarar rayuwarsu bayan barazana ga harkar noma da kasar take takama da shi, duk kuma a sakamakon ayyukan 'yan ina da kisan da suka addabi jihar ta Zamfara da ke sashen arewacin Tarrayar Najeriya. To sai dai kuma daga dukkan alamu wani sabon hobbasa a bangare na jami'an tsaron Tarrayar ta Najeriyar ya fara nuna alamun nasara da kuma magance matsalar barayin shanu da suka hana ruwa gudu a yankin. Kuma a fadar babban hafsan sojin saman na Najeriya Air Marshal Sadiq Abubakar, akwai alamun nasara da nufin kai karshen barazanar da ke zaman barazanar tsaro mafi girma a cikin kasar a halin yanzu.

An dai dauki lokaci ana kallon tashi da lafawar rikicin da kan tada hankulan kauyuka dama kisa irin na kan mai uwa da wabi a garuruwa da dama a jihar. Har ma ana zargin rikidewar yanayin da Boko Haram. To sai dai a fadar Air Marshal Sadiq din babu wata alama da ke iya danganta abun da ke faruwa a zamfaran da Boko Haram.

Tarayyar Najeriyar dai na shirin fuskantar zabe a nan gaba kuma rikicin rashin tsaron na iya illa ga makomar zaben da ma watakila makomar kasar baki daya, hujjar kuma da a cewar Air Marshal Sadiq babu gudu babu ja da baya ga tabbatar da kare zubda jini a zamfara dama makwabtan na Zamfara. Abun jira a gani dai na zaman nasarar ayyukan jami'an tsaron a kokarin sake dasa wata damba ta zaman lafiya da kwanciyar hankalin al'umma a kasar.