Amirka ta ladabtar da Rasha kan yunkurin kisan Navalny

A sakamakon da masu binciken a Amirka suka gudanar, sun tabbatarwa duniya cewa, manyan jami'an tsaron kasar shida, sun hada baki a sanya wa Navalny sinadarin Novichok mai saurin kisa, wanda kuma haramtaccen sinadari ne. Gwamnatin Biden dai, ta hada kai da Tarayya Turai da ta riga ta sanya takunkumi kan manyan jami'an gwamnati da ta ce nada hannu dumu-dumu a yunkurin kisan Navalny.

Wannan shi ne karon farko da sabuwar gwamnatin Shugaba Joe Biden ke azawa Rasha takunkumi tun bayan soma jan ragamar mulkin kasar a watan Janairun wannan shekarar ta 2021. Dama gwamnatin Biden ta sha alwashin tunkarar Shugaba Vladimir Putin bisa zarge-zarge na kama 'yan adawa da kusten da kasar ke yi ma kasashen duniya. 

Alexie Navalny ya zame wa gwamnatin Putin karfen kafa, wanda ake ganin a dailin hakan ne aka yi kokarin halaka shi da guba a watan Augustan bara, amma kuma yayi sa'ar tsallake rijiya da baya. An ruga da shi wani asibiti a Jamus inda aka yi masa magani kafin daga bisani ya koma Rasha, amma jim kadan da isa Moscow, aka kama shi tare da yanke masa hukuncin zaman gidan yari na shekaru uku da rabi.