1. Tsallake zuwa shafin jadawali
  2. Tsallake zuwa jadawalin abubuwan da shiri ya kunsa
  3. Tsallake zuwa karin wasu shafukan DW
Talabijin kai tsaye
Shirye-shiryen DW HausaBidiyo
Mayar da hankali
Ilimin Fasahar Zamani
Siyasa

Gagarumin garanbawul a gwamnatin Saudiyya

Abdullahi Tanko Bala
December 28, 2018

Sarki Salman na Saudiyya ya bada umarnin aiwatar da gagarumin garanbawul ga gwamnatin kasar wanda ya hada da sauyin wuraren aiki ga wasu masu rike da muhimman mukamai na siyasa

https://p.dw.com/p/3AiK8
Saudi Arabien König Salman bildet Kabinett um | Kronprinz Mohammed bin Salman und König Salman
Hoto: picture-alliance/AP Photo

A karkashin garanbawul din an nada ministan kudi Ibrahim al-Assaf a matsayin sabon ministan harkokin waje. 

A baya dai an tsare Ibrahim al Assaf yayin dirar mikiyar da yarima Mohammed bin Salman ya kaddamar a bara na yaki da cin hanci, a yanzu zai maye gurbin Adel al Jubair wanda aka mayar da shi matsayin mashawarci kuma karamin minista a ma'aikatar harkokin waje.

Haka nan kuma sarkin ya nada yarima Abdullahi bin Bandar bin Abdulaziz ya maye gurbin yarima Miteb bin Abdullah a matsayin shugaban rundunar tsaron kasa.

Garanbawul din dai na zuwa ne yayin da gwamnatin Saudiyyar ke kokarin dakile matsin lambar da ta ke fuskanta daga kasashen duniya game da kisan dan jaridar nan Jamal Khashoggi a ofishin jakadancin Saudiyya a Istanbul a watan Oktoba.

Sabbin nade naden dai za su taimakawa Yarima mai jiran gado Mohammed Bin Salman rike madafan iko kasancewar yawancin wadanda aka nada din mutane ne na hannun damansa.