روسی فوج نے کاخووکا ڈیم اڑا دیا، یوکرین کا الزام

جنوبی یوکرین میں روس کے زیر قبضہ شہر خیر سون میں جاری لڑائی میں ایک اہم ڈیم کو شدید نقصان پہنچا ہے۔  مقامی گورنر کے مطابق  متاثرہ علاقے سے لوگوں کے انخلاء  کا عمل شروع ہو گیا ہے۔ اسی دوران یوکرینی صدر وولو دیمیر زیلنسکی نے باخموت کے قریب مبینہ پیش قدمی  پر اپنے فوجیوں کی تعریف کی۔

یوکرین اور  روسی حکام نے منگل کے روز کہا کہ جنوبی یوکرین میں کاخووکا ڈیم کو دھماکے سے اڑا دیا گیا، جس سے دریائے دنیپرو کے ساتھ نشیبی علاقوں میں سیلاب کا خطرہ ہے۔

یوکرین کی سرکاری ہائیڈرو الیکٹرک کمپنی نے کہا کہ انجن روم کے اندر دھماکے کے بعد پاور پلانٹ 'مکمل طور پر تباہ' ہو گیا۔

سوویت دور کا یہ ہائیڈرو الیکٹرک پلانٹ  جزیرہ نما کریمیا کو بھی پانی فراہم کرتا ہے، جسے روس نے 2014 ء میں ضم کر لیا تھا، اور زاپروژیا  جوہری پلانٹ کو بھی پانی اسی ڈیم سے فراہم کیا جاتا ہے، یہ بھی روسی کنٹرول میں ہے۔

یوکرینی الزام

یوکرین  کی مسلح افواج کی جنوبی کمان نے منگل کی صبح اپنے فیس بک پیج پر پوسٹ کی گئی ایک تحریر میں کہا،''کاخووکا کے آبی ذخیرے کو روسی قابض افواج نے اڑا دیا۔ تباہی کے پیمانے، پانی کی رفتارو حجم اور ان علاقوں کا جائزہ لیا جارہاہے جو ممکنہ طور پر سیلاب کا شکار ہو سکتے ہیں۔''

یوکرین میں خیرسون علاقائی انتظامیہ نے کہا کہ پانی کی سطح پانچ گھنٹوں میں خطرناک حد کو پہنچ جائے گی اس کے پیش نظر ممکنہ طور پر متاثر ہونے والے علاقوں سے آبادی کو نکالنا شروع کر دیا گیا ہے۔

یوکرین کے صدر وولودیمیر زیلینسکی نے کہا، ''کاخووکا ہائیڈرو الیکٹرک پاور پلانٹ ڈیم کی تباہی پوری دنیا کے سامنے صرف اس بات کی تصدیق کرتی ہے کہ انہیں(روسیوں کو) یوکرینی سرزمین کے ہر کونے سے بے دخل کیا جانا چاہییے۔ ان کے لیے ایک میٹر جگہ بھی نہیں چھوڑنی چاہییے، کیونکہ وہ ہر میٹر کو دہشت گردی کے لیے استعمال کرتے ہیں۔''

رات کی تاریکی میں حملہ

یوکرین  کے دارالحکومت کی فوجی انتظامیہ نے میسجینگ ایپ ٹیلی گرام پر بتایا کہ شہر میں نصب فضائی دفاعی نظام منگل کے پہلے پہر سے ہی اس علاقے میں فضائی حملوں کو پسپا کرنے میں مصروف تھا۔

یوکرینی دارالحکومت کے میئر وٹالی کلچکو نے بھی کہا کہ کییف میں دھماکوں کی جو آوازیں سنائی دیں وہ فضائی دفاعی نظام کے جوابی حملوں   کی آوازیں تھی۔

حملے کے بعد کییف کی فوجی انتظامیہ نے کہا کہ فضائی دفاع نے دشمن کی طرفے سے بھجوائے گئے 20 سے زیادہ اوبجیکٹس کو تباہ کر دیا۔

روس کی طرف سے  یوکرین کے شہروں پر فضائی حملوں کی ایک اور لہر شروع کرنے کے نتیجے میں یوکرین میں راتوں رات ہوائی حملوں کا الرٹ نافذ کر دیا گیا۔

متضاد دعوے

یوکرین  کے صدر وولودیمیر زیلنسکی نے پیر کو تباہ شدہ شہر باخموت کے قریب پیش قدمی کے دعوے کے تناظر میں اپنے فوجیوں کی تعریف کی، جب کہ روس نے کہا کہ اس نے بڑے پیمانے پریوکرینی  حملے کو پسپا کر دیا ہے۔

زیلنسکی کا اپنی عوام سے  رات کے ویڈیو خطاب کے دوران کہنا تھا،  ''وہ خبر جس کا ہم انتظار کر رہے ہیں، اُس کا خیر مقدم کرتا ہوں۔'' یوکرینی صدر نے مزید کہا،''میں ہر ایک سپاہی کا، اپنے تمام محافظوں، مردوں اور عورتوں کا شکر گزار ہوں، جنہوں نے آج ہمیں وہ خبر دی جس کا ہم انتظار کر رہے تھے۔ باخموت سیکٹر میں بہترین کار کردگی پیش کرنے والے سپاہیو، گُڈ جاب ۔''

ک م/ ش خ(اے پی، روئٹرز،ڈی پی اے)

 LINK: https://www.dw.com/a-65833125