یورپی سربراہ کانفرنس ختم، بریگزٹ معاہدے پر عدم اتفاق برقرار

آسٹریا کے شہر سالزبرگ میں یورپی سمٹ کے دوران جرمن چانسلر انگیلا میرکل نے کہا ہے کہ بریگزٹ کی تکمیل کے لیے اگلے مہینے اکتوبر میں بہت سارے معاملات کو مکمل کرنا بہت ضروری ہے۔ سالزبرگ میں رپورٹرز کے ساتھ گفتگو کرتے ہوئے انہوں نے کہا کہ اکتوبر میں بھرپور انتظامی اقدامات سے بریگزٹ معاملات کو حتمی شکل دینا ضروری ہے اور اِسی بنیاد پر حتمی سمجھوتہ ممکن ہو گا۔

سربراہی ملاقات کے پہلے روز بدھ 19 ستمبر کو برطانوی وزیر اعظم ٹریزا مے نے بریگزٹ مذاکرات میں یورپی یونین سےگنجائش کا مطالبہ کیا۔ مے کے بقول برطانیہ نے اس تناظر میں اپنی پوزیشن کو بہتر بنایا ہے اور یورپی یونین کو بھی چاہیے کہ وہ بھی کچھ آگے بڑھے۔ مے نے مزید کہا کہ آزاد تجارت کے ایک زون کے قیام پر برطانیہ کے ساتھ بھی ویسے ہی بات چیت ہونی چاہیے جیسے کسی اور ملک کے ساتھ مذاکرات کیے جاتے ہیں۔

دوسری جانب یورپی یونین کے سربراہ اجلاس میں شریک رہنماؤں نے اتفاق کیا کہ بریگزٹ مذاکرات میں لچک نہیں دکھائی جائے گی اور اکتوبر میں پیش رفت سامنے آئی تو رواں برس نومبر میں خصوصی سمٹ کا انعقاد کیا جائے گا۔ آسٹریا کے چانسلر سباستیان کرس نے کہا کہ بریگزٹ ڈیل کو حتمی شکل دینے کی خاطر نومبر میں ایک خصوصی ملاقات کی جائے گی۔

مہاجرت کے موضوع پر جامع مذاکرات کی ضرورت

آسٹریا کے شہر سالزبرگ میں ہونے والی دو روزہ سربراہی ملاقات میں مہاجرین کے بحران پر بھی بات چیت ہوئی۔ یورہی رہنماؤں نے زور دیا ہے کہ غیرقانونی مہاجرت کو روکنے کی خاطر مصر سمیت دیگر شمالی افریقی ممالک کے ساتھ جامع مذاکرات کی ضرورت ہے۔

یورپی یونین کی سربراہی سمٹ میں اتفاق کیا گیا ہے کہ انسانوں کی اسمگلنگ کو روکنے کی خاطر زیادہ اقدامات کرنا چاہییں۔ آسٹریائی چانسلر سیباستیان کُرس نے آج جعمرات کے دن کہا کہ غیرقانونی مہاجرت کے سدباب کی خاطر مشترکہ حکمت عملی لازمی ہے۔

ا ب ا /ع ح (خبر رساں ادارے)