ہیبرون میں مبصر مشن کا خاتمہ، جرمنی کا اظہار افسوس

جرمن وزارت خارجہ کے ایک ترجمان کے مطابق، ’’ٹی آئی پی ایچ ان بین الاقوامی کوششوں کا حصہ تھا، جو مشرق وسطی تنازعے کی شدت کم کرنے یا اس کے حل کے لیے کی جا رہی ہیں۔ اب کسی متبادل کے بغیر یہ ختم ہو گیا۔‘‘

اسرائیلی وزیر اعظم بینجمن نیتن یاہو ’Temporary International Presence in Hebron‘ نے اکتیس جنوری کو اس معاہدے کی ختم ہونے والی میعاد میں توسیع کرنے سے انکار کر دیا تھا، ’’ہم کسی ایسے بین الاقوامی مشن کو مزید کام کرنے کی اجازت نہیں دے سکتے،جو ہمارے ہی خلاف کام کر رہا ہو۔‘‘

ہیبرون یا الخلیل ایک منقسم شہر ہے، جہاں دو لاکھ فلسطینی اور کئی ہزار یہودی آباد ہیں۔ ان یہودیوں کو فوجی دستے حفاظت فراہم کرتے ہیں۔ جرمن وزیر خارجہ کے مطابق، ’’الخلیل ایک ایسی جگہ ہے، جہاں مشرق وسطی تنازعے کی شدت کو واضح طور پر محسوس کیا جا سکتا ہے، بین الاقوامی مبصرین کی موجودگی کی وجہ سے شفافیت پیدا ہوئی اور تناؤ میں کمی واقع ہوئی۔‘‘

اس بیان میں مزید کہا گیا کہ فریقین کی جانب سے تسلیم شدہ مشن نے فلسطینیوں اور یہودیوں کے مابین جھگڑے و فساد کو ختم کرانے کے لیے ہر ممکن کوشش کی، ’’اب یہ سب کچھ کرنے کے بارے میں لازمی سوچنا ہے کہ الخلیل میں تشدد میں کوئی اضافہ نہ ہو۔‘‘

اسرائیل کی جانب سے ان مبصرین پر پہلے بھی تنقید کی جاتی رہی ہے۔ اسرائیلی ذرائع ابلاغ کے مطابق اس مشن کا حصہ ایک سوئس شہری کو ایک اسرائیل نوجوان کو چہرے پر تھپڑ مارنے کی وجہ ملک بدر بھی کیا گیا تھا۔ اس کے علاوہ ایک اور واقعے میں اس مبصر مشن کے ایک رکن نے ایک اسرائیلی یہودی آباد کار کی گاڑی کے ٹائر کاٹ دیے۔ بتایا جاتا ہے کہ ان واقعات کی ویڈیو ریکارڈنگ بھی موجود ہیں۔

اسرائیلی اخبار ’ہاریٹز‘ نے لکھا ہے کہ دسمبر میں اس مشن کی ایک داخلی رپورٹ میں اسرائیل  کو بین الاقوامی قوانین کی متعدد خلاف ورزیوں کا ذمہ دار قرار دیا گیا۔ اس رپورٹ کے مطابق فلسطینی اسرائیل کے زیر قبضہ علاقوں میں آزادی سے گھوم پھر بھی نہیں سکتے۔