گلگت بلتستان: اسکول جلانے والوں کے خلاف کارروائی

گلگت بلتستان میں پولیس چیف ثنا عباسی نے خبر رساں ادارے اے ایف پی سے بات کرتے ہوئے کہا کہ اس سرچ آپریشن میں ایک پولیس اہلکار ہلاک اور ایک زخمی ہوا ہے جبکہ سترہ مشتبہ افراد کی گرفتاریاں عمل میں لائی گئی ہیں۔

شر پسندوں کی جانب سے اسکول نذر آتش کیے جانے کے واقعات جمعرات کی رات گلگت بلتستان کے ضلعے دیامر کی تحصیلوں دارل اور تنگر میں رونما ہوئے تھے۔

گلگت بلتستان حکومت کے ترجمان فیض اللہ فراق کا کہنا ہے کہ جلے ہوئے اسکولوں کی عمارتوں کو اگست کے آخری ہفتے میں گرمیوں کی تعطیلات ختم ہونے سے پہلے مرمت کر دیا جائے گا۔

مشتبہ افراد نے جمعرات کی رات گیارہ اسکولوں کو آگ لگا دی تھی۔ ان میں یا تو بچیوں کے اسکول تھے یا پھر وہ تعلیمی مراکز جہاں لڑکے اور لڑکیاں ایک ہی جگہ پڑھائی کرتے تھے۔

گزشتہ روز نوبل انعام یافتہ پاکستانی ملالہ یوسف زئی نے ان اسکولوں کی فوری تعمیر کا مطالبہ کیا تھا۔ ملالہ نے ایک ٹویٹ پیغام میں لکھا،’’ انتہا پسندوں نے ظاہر کر دیا ہے کہ وہ کس چیز سے سب سے زیادہ خوفزدہ ہیں۔ ایک بچی کے ہاتھ میں کتاب سے۔‘‘

پاکستان کے آئندہ متوقع وزیر اعظم عمران خان نے بھی اسکولوں پر کیے گئے ان حملوں کی مذمت کرتے ہوئے کہا ہے کہ اقتدار میں آنے کے بعد وہ تعلیمی اداروں کی سکیورٹی مزید بہتر بنائیں گے۔

 گلگت بلتستان کا شمار فرقہ واریت کے حوالے سے حساس ترین علاقوں میں ہوتا ہے۔ اس خطے میں مجموعی طور پر اثناء عشری شیعہ اور اسماعیلی شیعہ برادری کی اکثریت ہے۔ یہ علاقہ سی پیک کا گیٹ وے بھی کہلاتا ہے اور سی پیک کے کئی اہم منصوبے یہاں زیرِ تعمیر ہیں۔ بھارت اس علاقے کو متنازعہ قرار دیتا ہے کیونکہ یہ بھارت اور پاکستان کے درمیان متنازعہ علاقے کشمیر سے نتھی ہے۔   

ص ح/ ع ت / اے ایف پی