قریشی کا بیان، حقیقت یا افسانہ؟

پاکستانی وزیرِ خارجہ نے اتوار سات اپریل کو ایک بیان میں کہا تھا کہ بھارت پاکستان پر حملے کی تیاری کر رہا ہے۔ قریشی کے مطابق یہ بھارتی حملہ 16 سے 20 اپریل کے درمیان ہو سکتا ہے۔ بھارت کی وزراتِ خارجہ کے ترجمان راویش کمار نے اس بیان کی سختی سے تردید کی ہے اور اسے غیرذمہ دارانہ و مضحکہ خیز قرار دیا۔
دونوں ممالک کے درمیان پلوامہ حملے کے بعد سے صورتحال تناؤ کا شکار ہے۔ حالیہ ہفتوں میں نہ صرف دونوں ریاستوں کے رہنماوں نے تند وتیز بیانات دیے ہیں بلکہ دونوں ممالک کی فوجیں بھی سرحد پر گولہ باری میں مصروف رہی ہیں۔

’اطلاعات واقعی درست ہیں‘

کئی تجزیہ نگاروں کے خیال میں صورتِ حال اب بھی کشیدہ ہے اور اس کشیدہ صورتِ حال میں شاہ محمود کے بیان نے اس خیال کو تقویت دی ہے کہ بھارت واقعی پاکستان کے خلاف کسی حملے کی تیاری کر رہا ہے۔ معروف دفاعی تجزیہ نگار جنرل امجد شعیب کے خیال میں شاہ محمود کا بیان سو فیصد صحیح ہے: ’’میری اطلاعات کے مطابق ان کا یہ بیان بالکل صحیح ہے۔ ہمارے پاس ایسی اطلاعات کئی ہفتوں سے تھیں کہ بھارت پاکستان پر حملہ کرنے کا منصوبہ بنا رہا ہے۔ اس کی کئی ذرائع سے تصدیق کے بعد ہی شاہ محمود قریشی نے یہ بیان جاری کیا ہے۔ اس بیان کوجاری کرنے سے دو دن پہلے پاکستان کی سیکریڑی خارجہ نے یو این سکیورٹی کونسل کے پانچ مستقل ارکان کے نمائندوں کو بھی اس حوالے سے بریفنگ دی تھی۔‘‘
ماہر ین کا خیال ہے کہ اس طرح کی معلومات عموماﹰ ایسے ممالک کے پاس ہوتی ہے، جن کے پاس انتہائی جدید ٹیکنالوجی ہو، جیسا کہ روس یا امریکا۔ سوال یہ ہے کہ کیا پاکستان کے پاس ایسی ٹیکنالوجی ہے کہ جس کی بدولت اسلام آباد بھارتی حکام کا کوئی خفیہ پیغام سن سکے، جس میں ایسے حملے کے اشارے ہوں۔ لیکن معروف مصنفہ اور تجزیہ نگار عائشہ صدیقہ کے خیال میں یہ ٹیکنالوجی کا معاملہ نہیں ہے: ’’بھارت کے اندر پاکستان کی ہیومن انٹلیجنس بہت اچھی ہے تو ممکن ہے کہ انہوں نے اس کے بارے میں سنا ہو۔ میرے خیال میں پلوامہ حملے کے بعد بھارت کے لیے یہ منطقی ہے کہ وہ پاکستان پر دباؤ رکھے لیکن پاکستان نے اعلان کر کے یہ واضح کر دیا ہے کہ اس کی فوجیں ایکشن کے لیے تیار ہیں۔‘‘

’مسائل سے توجہ ہٹانے کی کوشش‘
تاہم کئی ناقدین کے خیال میں یہ پی ٹی آئی حکومت کی طرف سے مسائل سے توجہ ہٹانے کی کوشش ہے جب کہ بھارت میں بی جے پی بھی یہی کام کر رہی ہے تاہم دونوں کے مقاصد مختلف ہیں۔ ایریا اسٹڈی سنٹر، پشاور یونیورسٹی کے سابق ڈائریکٹر ڈاکٹر پروفیسر محمد سرفراز خان کے خیال میں شاہ محمود کا بیان حقیقت کا عکاس نہیں: ’’یہ وہی شاہ محمود ہیں جو کچھ دن پہلے جہانگیر ترین کے خلاف بیان دے رہے تھے۔ اب انہوں نے یہ شوشہ چھوڑ دیا ہے۔ بات یہ ہے کہ پی ٹی آئی کی حکومت بری طرح ناکام ہوگئی ہے۔ سعودی عرب اور دوسرے ممالک نے مالی مدد کرنے سے معذوری ظاہر کر دی ہے۔ ٹیکس جمع نہیں ہورہے ہیں۔ معاشی حالات بد سے بد تر ہورہے ہیں۔ مہنگائی بڑھ رہی ہے۔ پلوامہ حملے کے بعد سے پاکستان پر بین الاقوامی دباؤ آرہا ہے کہ وہ بھارت اور افغانستان میں مداخلت بند کرے۔ تو ان تمام مسائل سے توجہ ہٹانے کے لیے پی ٹی آئی نے یہ شوشہ چھوڑا ہے۔‘‘
محمد سرفراز خان کا مزید کہنا تھا کہ بھارت میں مودی انتخابات جیتنے کے لیے جنگ کی باتیں کر رہے ہیں، ’’لیکن حقیقت میں جنگ کا کوئی امکان نہیں کیونکہ دونوں ممالک جوہری ہتھیاروں سے لیس ہیں اور جنگ کے متحمل نہیں ہوسکتے۔‘‘

’اسٹیبلشمنٹ صورتحال کی ذمہ دار‘
پاکستان میں پی ٹی آئی کی حکومت کی مبینہ ناکامیوں پر حزبِ اختلاف اور میڈیا کی طرف سے حملے ہو رہے ہیں۔ کچھ ناقدین یہ سمجھتے ہیں کہ چونکہ فوج عمران خان کو اقتدار میں لے کر آئی ہے، اس لیے اب فوج پر بھی تنقید ہو رہی ہے اور اس تنقید سے جان چھڑانے کے لیے اسٹیبلشمنٹ جنگجویانہ ماحول پیدا کرنا چاہتی ہے۔

وفاقی اردو یونیورسٹی سے تعلق رکھنے والے تجزیہ نگار اس صورتِ حال کا ذمہ دار اسٹیبلشمنٹ کو قرار دیتے ہیں: ’’میرے خیال میں عسکری حلقے جنگجویانہ ماحول پیدا کرنا چاہتے ہیں کیونکہ ایسے ماحول میں ان کی اہمیت بڑھ جاتی ہے اور ہر جگہ ان کی واہ واہ شروع ہوجاتی ہے۔ پی ٹی آئی ان ہی کی لائی ہوئی ہے، اس لیے وہ اس ایجنڈے کو ہوا دے رہی ہے لیکن حقیقت میں تو جنگ کے آثار کوئی نہیں ہے۔ آپ نے اپنا ایئر اسپیس بھی کھول دیا ہے۔ دونوں ممالک کے سفیر بھی واپس آگئے ہیں تو کہاں ہیں جنگ کے آثار۔‘‘