چھ پیرا ملٹری فوجیوں کی ہلاکت، پاکستان کا ایران سے احتجاج

پاکستانی وزارت خارجہ کی جانب سے جاری ہونے والے ایک بیان کے مطابق ایرانی سفیر  سے مطالبہ کیا  گیا ہے کہ حملے کے ذمہ دار گروپ کے خلاف کارروائی کی جائے۔ ابھی تک کسی بھی گروہ نے اس حملے کی ذمہ داری قبول نہیں کی ہے اور نہ ہی حکومت پاکستان نے کسی گروہ کو مورد الزام ٹھہرایا ہے۔

بتایا گیا ہے کہ جمعے کو تقریبا تیس عسکریت پسندوں نے فرنٹیئر کور کے ایک قافلے کو نشانہ بنایا، جس کے نتیجے میں چھ فوجی مارے گئے جبکہ چودہ زخمی ہوئے۔ پاکستانی سکیورٹی اداروں نے جوابی کارروائی کے دوران چار حملہ آوروں کو بھی ہلاک کرنے کا دعویٰ کیا ہے لیکن اس دعوے کی آزاد ذرائع سے تصدیق ممکن نہیں ہو سکی۔

دوسری جانب ایرانی حکومت نے ہفتے کے روز اس حملے کی شدید الفاظ میں مذمت کرتے ہوئے پاکستان کو مکمل تعاون کی یقین دہانی کروائی ہے۔ پاک ایران سرحد مختلف عسکری گروہوں کے ساتھ ساتھ منشیات کے اسمگلر بھی سرگرم ہیں۔

اکتوبر میں عسکریت پسندوں نے اسی علاقے میں تقریباﹰ ایک درجن ایرانی سرحدی فوجیوں کو اغوا کر لیا تھا۔ ان میں سے پانچ کو غیر واضح حالات میں پاکستان میں رہا کیا گیا تھا۔ اس وقت ایران نے الزام عائد کیا تھا کہ حملہ آور پاکستانی سرحد کے اندر سے آئے تھے۔

نیوز ایجنسی اے ایف پی کے مطابق ایران کا صوبہ سیستان بلوچستان طویل عرصے سے ایسے بلوچ علیحدگی پسندوں اور جہادیوں کی کارروائیوں کا بھی نشانہ بنا ہوا ہے، جو سرحد کے آر پار عسکری کارروائیاں کرتے رہتے ہیں۔

اٹھائیس ستمبر کو ایرانی سرحدی گارڈز نے کہا تھا کہ انہوں نے ایسے چار عسکریت پسندوں کو ہلاک کر دیا تھا جو غیر قانونی طور پر ایرانی علاقے میں داخل ہوئے تھے۔ پاکستان سے یورپ جانے والے غیر قانونی مہاجرین کو بھی اسی سرحد کے ذریعے پاکستان سے ایران اور پھر ایران سے ترکی تک منتقل کیا جاتا ہے۔

ا ا / ع ت ( اے پی، اے ایف پی)