پیاز کی سیاست
پیاز نے آج کل جنوبی ایشیا کے دو پڑوسی دوست ملکوں کے تعلقات میں تلخی پیدا کر دی ہے۔ بنگلہ دیش نے بھارت کی طرف سے پیاز کی برآمدات اچانک اور بغیر اطلاع کے روک دیے جانے پر ناراضگی اور ’شدید تشویش‘ کا اظہار کیا ہے۔
بھارت پر انحصار
بنگلہ دیش پیاز کی اپنی گھریلو ضرورت کے لیے بڑی حد تک بھارت پر انحصار کرتا ہے۔ اس کی ماہانہ کھپت دو لاکھ ٹن ہے۔ فی الحال اس کے پاس ساڑھے پانچ لاکھ ٹن کا اسٹاک ہے اور اس نے ترکی سے پیاز درآمد کرنے کا فیصلہ کیا ہے۔
پیاز کی تلخی
گزشہ ستمبر میں بھی بھارت نے بنگلہ دیش کو پیاز کی برآمدات رو ک دی تھی جس کی وجہ سے دونوں ملکوں کے تعلقات میں تلخی پیدا ہوگئی تھی۔ گزشتہ اکتوبر میں بنگلہ دیشی وزیر اعظم نے بھارت کے دورے کے دوران کچھ یوں شکایت کی تھی”مجھے معلوم نہیں، آپ نے کیوں پیاز بند کردیا، تھوڑا نوٹس دینے سے اچھا ہوتا، اچانک بند کردیا اور ہمارے لیے مشکل کھڑی ہوگئی۔ “
کوئی خزانہ مل گیا
بنگلہ دیش میں چٹاکانگ کے خاتون گنج میں یہ بچے ایک ندی سے سڑے ہوئے پیاز نکال رہے ہیں۔ جسے تھوک تاجروں نے سڑجانے کے بعد ندی میں پھینک دیا تھا۔
موقع کا فائدہ
افریقی ملک سنیگال میں عیدالفطر کے موقع پر پیاز سے خصوصی ڈش تیار کی جاتی ہے، جس کی وجہ سے پیاز کی مانگ کافی بڑھ جاتی ہے اور تاجر زیادہ سے زیادہ منافع کمانے کی کوشش کرتے ہیں جس کے نتیجے میں بعض اوقات جھگڑے تک کی نوبت آجاتی ہے۔
ہائے یہ مجبوریاں
جنوب مشرقی ترکی کے شہر دیار باقر میں یہ کرد خاتون ایک بازار میں پیاز فروخت کرنے جارہی ہے۔ دیار باقر میں 2016 کے اوائل میں سیکورٹی فورسیز اور کردش ورکرز پارٹی کے جنگجووں کے درمیان تقریباً تین ماہ تک جنگ ہوتی رہی تھی۔
احتجاج کا ہتھیار؟
جنوبی غزہ پٹی میں اسرائیل۔غزہ کی سرحد پر اسرائیلی فوج کے خلاف مظاہرے کے دوران اس فلسطینی نے توپیاز کو احتجاج کا ہتھیار بنالیا۔
کفایہ تحریک
قاہرہ میں سیدہ زینب مسجد کے سامنے ہاتھوں میں روٹی اور پیا ز اٹھائے ہوئے حکومت کے خلاف مظاہرہ کرنے والی یہ خاتون کفایہ تحریک کی حامی ہے۔ کفایہ تحریک کو بعض افراد عوامی تحریک اورصدر حسنی مبارک کے زوال کا آغاز بھی قرار دیتے ہیں۔
پیاز نے حکومت گرادی
پیاز بھارت میں ایک اہم سیاسی موضوع رہا ہے۔ 1998میں دہلی اور راجستھان کے ریاستی انتخابات میں پیاز کی اونچی قیمتیں حکومت کو لے ڈوبی تھیں۔ اب بھی جب کبھی پیاز کی قیمتیں بڑھتی ہیں تو حکومت وقت کی پریشانیاں بڑھ جاتی ہیں۔
پاکستانی امداد
یوں تو بھارت اور پاکستان میں تعلقات کبھی بھی بہت زیادہ خوشگوار نہیں رہے ہیں۔ تاہم مشکل گھڑی میں دونوں نے ایک دوسرے کی مدد بھی کی ہے۔ 2015 میں جب بھارت میں پیاز کی فصل خراب ہونے کی وجہ سے اس کی قیمتیں آسمان کو چھونے لگی تھیں تو پاکستان نے بڑی مقدار میں پیاز برآمد کیا۔ یہ تصویر کراچی کے ایک مارکیٹ کی ہے۔ تحریر: جاوید اختر