پارا چنار میں دھماکے کے بعد سکیورٹی فورسز کے خلاف احتجاج

پاکستان کے شمالی مغرب میں واقع قبائلی ضلع کرم کے مرکزی شہر پاراچنار میں جمعرات کے روز یہ دھماکا مصروف ترین طوری بازار میں ایک بچے کی سبزی کی ریڑھی میں رکھے گئے بم کے پھٹنے سے ہوا۔ اس واقعے میں کم از کم 18 افراد زخمی ہوگئے، جس میں ایک خاتون اور بچہ بھی شامل ہے۔ متاثرہ افراد کو مقامی ہسپتال پہنچا دیا گیا۔

پاراچنار کے مقامی رہائشی عظمت بنگش نے جمعہ کو جرمن خبر رساں ادارے کو بتایا کہ اس واقعے کے بعد ہزاروں افراد سکیورٹی فورسز کے خلاف غم و غصہ کا اظہار کرنے کے لیے سڑکوں پر نکل آئے۔ مقامی میڈیا کے مطابق دھماکے کے خلاف احتجاج کرتے ہوئے مشتعل ہجوم اور قانون نافذ کرنے والے اداروں کے درمیان جھڑپیں بھی ہوگئیں۔ دھماکے کے بعد بازار کی تمام دکانیں اور بازار بند کردیے گئے۔

پاراچنار میں پکڑے جانے والے مشکوک لوگ کون تھے؟

’یہ کام کسی نے بھی کیا ہو، انگلیاں تو سکیورٹی اداروں پر ہی اٹھیں گی‘

پاکستانی فوجی کی جرمنی میں پناہ کی تلاش کی کہانی

اس دوران سوشل میڈیا پر پاراچنار دھماکے کی مذمت کے سلسلے میں مختلف آرا کا اظہار کیا جارہا ہے۔ بعض صارفین سوال کر رہے ہیں کہ اس خطے میں فوج کی بھاری نفری تعینات ہونے کے باوجود امن و امان کی صورت حال میں بہتری کیوں نہیں آ رہی۔ 

پاکستان میں پشتون تحفظ موومنٹ کے رہنما اور رکن قومی اسمبلی محسن داوڑ نے ایک ٹوئیٹ میں پوچھا، ’’خیبر پختونخواہ میں دہشت گردی لوٹ رہی ہے اور پاراچنار اس سے مستثنیٰ نہیں ہے۔ سکیورٹی فورسز کہاں ہیں اور ان سے احتساب کا سوال کرنا جرم کیوں ہے؟‘‘

پاراچنار کے مکینوں نے پریس کلب کے سامنے دھماکے کے خلاف احتجاج کرتے ہوئے رات بھر دھرنا دیے رکھا۔ مظاہرے میں شریک علی طوری نے بتایا کہ سینکڑوں مظاہرین پوری رات پریس کلب کے سامنے کھلے آسمان کے نیچے موجود رہے۔ 

مظاہرین کی جانب سے دھماکے میں ملوث افراد کی گرفتاری کا مطالبہ کیا جارہا ہے۔ پشتون تحفظ موومنٹ کے رہنما منظور پشتین  نے کہا، ’’تشدد کی یہ لہر کئی ماہ سے جاری ہے۔ ہم اس کا خاتمہ چاہتے ہیں۔‘‘ واضح رہے پچاس ہزار سے زائد نفوس پر مشتمل شہر  پاراچنار میں حالیہ برسوں کے دوران متعدد بم دھماکے  ہوچکے ہیں، جن میں کئی افراد کی جانیں بھی ضائع ہوئی تھیں۔
ع آ / ع ح (ڈی پی اے، ٹوئٹر)