ٹیکساس کا طوفان ’ویک اپ کال‘ تھی، وائٹ ہاؤس کی مشیر

امریکی صدر  جو بائیڈن کی ماحولیاتی تبدیلیوں کی قومی مشیر جینا میکارتھی نے امریکی ریاست ٹیکساس اور دیگر ریاستوں میں حال ہی میں آنے والے برفانی طوفان کو ماحولیاتی تبدیلیوں کا نتیجہ قرار دیتے ہوئے اسے عوام الناس اور  حکومت کے لیے ایک تنبیہ اور جاگ جانے کا پیغام قرار دیا ہے۔

اس برفانی طوفان کے بعد ایسی آوازوں میں شدت پیدا ہو گئی ہے کہ امریکا کو ایک ایسے انفراسٹرکچر کی ضرورت ہے جو طوفانی موسموں کو برداشت کر سکے۔

جرمنی میں شدید برفباری، ٹرانسپورٹ کا نظام متاثر

برفانی طوفان معمول کے مطابق نہیں

جینا میکارتھی نے امریکی نیوز ایجنسی ایسوسی ایٹد پریس کو دیے گئے انٹرویو میں واضح کیا کہ لوگ ٹیکساس اور دوسری ریاستوں میں آنے والے حالیہ طوفان کو بظاہر معمول کا موسمی عمل سمجھ رہے ہیں لیکن یہ ایسا نہیں ہے۔

امریکی ماہر ماحولیات کا کہنا ہے ریاست ٹیکساس میں آنے والا سنگین طوفان حقیقت میں موسمی تغیر اور تبدیل ہوتے موسم کا شاخسانہ تھا۔

میکارتھی نے لوگوں کو متنبہ کیا کہ وہ مستقبل میں ایسے شدید طوفانوں کی زیادہ آمد سے خبردار رہیں اور ان کی شدت کو برداشت کرنے کے لیے حکومت اور لوگوں کو مِل جُل کر اپنی توانائیاں ایک بہتر ماحول کے حصول پر خرچ کرنی ہوں گی۔

پولینڈ سے ترکی تک، برف کی چادر تن گئی

بہتر انفراسٹرکچر کی ضرورت

جینا میکارتھی نے لوگوں سے کہا کہ اگر وہ اپنے بچوں کو ایک صحت مندانہ ماحول دینا چاہتے ہیں تا کہ وہ یہ کہہ سکیں کہ ان کے بچوں کا مستقبل کسی حد تک محفوظ ہو گیا ہے تو انہیں ہمت سے بنیادی ڈھانچے یا انفراسٹرکچر کو تبدیل کرنا ہو گا۔ اس مقصد کے لیے نئی اور توانا تبدیلیوں کی اہمیت پر بھی انہوں نے فوکس کیا۔

جینا میکارتھی کا یہ انٹرویو ایسے وقت میں شائع کیا گیا ہے جب صدر جو بائیڈن اور ان کی اہلیہ نے ریاست ٹیکساس کے متاثرہ علاقوں کا دورہ مکمل کیا ہے۔ میکارتھی نے لوگوں سے کہا ہے کہ وہ برفانی طوفان کی آمد کو نظرانداز مت کریں اور مستقبل کی منصوبہ بندی پر بھی فوکس کریں۔

برفانی طوفان سے ہونے والا نقصان

ٹیکساس اور دوسری ریاستوں میں آنے والے شدید نوعیت کے برفانی طوفان سے بھاری مالی نقصان ہوا ہے۔ کم از کم چالیس افراد برف، سردی اور بجلی منقطع ہونے سے موت کے منہ میں چلے گئے۔ بے شمار افراد یخ بستہ مکانوں میں پھنس کر رہ گئے تھے۔ کئی عمارتوں اور مکانات کو گہرے نقصانات کا سامنا رہا۔

ٹیکساس کے دورے پر صدر جو بائیڈن کا کہنا تھا کہ ان کی حکومت لوگوں کو یہ امید دینا چاہتی ہے کہ ان کے بہتر مستقبل کو ایک نئے انداز میں تعمیر کیا جائے گا۔ امریکی صدر پہلے ہی قریب دو ٹریلین ڈالر سے ملک کے بنیادی انفراسٹرکچر کو تبدیل کرنے کے عزم کا اظہار کر چکے ہیں۔

مزید طوفان آئیں گے

جینا میکارتھی نے اپنے انٹرویو میں کہا کہ حالیہ طوفان بس یہی نہیں تھا بلکہ یہ سنگین اور خطرناک طوفانوں کے سلسلے کی شروعات ہے۔ انہوں نے کہا کہ سائنسی شواہد موجود ہیں اور وہ ظاہر کرتے ہیں کہ ایسے خطرناک طوفان مستقبل میں معمول کے مطابق آتے رہیں گے اور ہر ایک کی معاشرتی ذمہ داری ہے کہ وہ اپنی حالت بہتر کرنے کے ساتھ ساتھ اور دوسروں کا خیال رکھے۔

برفانی طوفان سے اسپین میں افراتفری، تین افراد ہلاک

میکارتھی کہ مطابق مستقبل میں برفانی طوفان سے پیدا ہونے والے بحران سے بچا جا سکتا ہے اور اس کے لیے ماحول دوستی کو اپنانا ہو گا۔ صدر جو بائیڈن کئی ماحول دوست اقدامات کو ترجیحی بنیاد پر متعارف کرانے کی پلاننگ کیے ہوئے ہیں۔

ع ح، ع ت (اے پی)