نیوزی لینڈ: چھ پاکستانی کرکٹ ٹیم ممبرز کورونا وائرس کا شکار

دورہ نیوزی لینڈ کے لیے پاکستان کے 53 رکنی اسکواڈ میں سے کم از کم چھ افراد کورونا وائرس کا شکار ہوگئے ہیں۔ نیوزی لینڈ کے حکام کے مطابق منگل 24 نومبر کو نیوزی لینڈ پہنچنے والے پاکستانی کھلاڑیوں اور ٹیم اسٹاف کو کرائسٹ چرچ میں ایک الگ مقام پر آئسولیشن ’ الگ تھلگ مقام‘ میں بھیجا گیا تھا اور پھر تمام اسکواڈ کے کورونا ٹیسٹ کیے گئے۔ ٹیسٹ کے نتائج کے مطاق 53 میں 6 اراکین کے ٹیسٹ کورونا پازیٹیو ہیں۔

یہ بھی پڑھیے: ہندوؤں کی تقریب میں شرکت پر شکیب الحسن معافی مانگنے پر مجبور

نیوزی لینڈ کرکٹ بورڈ نے بتایا ہے کہ 6 میں سے 4 متاثرہ افراد میں تازہ انفیکشن کی شناخت ہوئی ہے جبکہ دو میں وائرس کی موجودگی پرانی ہوسکتی ہے۔ ان متاثرہ کھلاڑیوں کو قرنطینہ کے لیے علیحدہ کر دیا گیا ہے۔ 

علاوہ ازیں اسکواڈ کے دیگر ممبرز کے پریکٹس سیسشنز منسوخ کردیے گئے ہیں اور وہ تب تک آئسولیشن میں رہیں گے جب تک ’مزید تفتیش مکمل نہیں ہوجاتی۔‘

مزید پڑھیے: انگلش کرکٹ ٹیم اگلے برس پاکستان کا دورہ کرے گی

ڈائریکٹر جنرل ہیلتھ ایشلی بلوم فیلڈ کے مطابق ٹیم کو پہلے ہی آخری وارننگ جاری کی گئی تھی کیونکہ متعدد ٹیم ممبرز نیوزی لینڈ کے آئسولیشن ضوابط کی خلاف ورزی کرتے پکڑے گئے تھے۔ ان کے بقول، ’’نیوزی لینڈ میں کرکٹ کھیلنے کے لیے آنا ایک اعزاز کی بات ہے لیکن اس کے بدلے ٹیموں کو مقامی برادری اور خود کو کورونا وائرس سے محفوظ رکھنا ہے۔‘‘

واضح رہے کہ نیوزی لینڈ کے لیے لاہور سے روانگی سے قبل تمام کھلاڑیوں کے چار مرتبہ کورونا ٹیسٹس کے منفی نتائج سامنے آئے تھے۔

پاکستان اور نیوزی لینڈ کے درمیان تین ٹی ٹوئنٹی اور دو ٹیسٹ میچز کی سیریز کھیلی جانی ہے جس کا پہلا ٹی ٹوئنٹی میچ 18 دسمبر کو آکلینڈ میں کھیلا جائے گا۔ پاکستان سے پہلے نیوزی لینڈ کی ٹیم کا ویسٹ انڈیز کے مدمقابل ہوگی۔ 

ع آ / ک م (ڈی پی اے، اے پی)