میانوالی ایئربیس پر حملے میں نو عسکریت پسند ہلاک

پاکستانی فوج کی طرف سے جاری ہونے والے ایک بیان کے مطابق آپریشن ختم ہو گیا ہے اور سکیورٹی فورسز نے تمام کے تمام حملہ آوروں کو ہلاک کر دیا ہے۔ تین حملہ آوروں کو بیس میں داخل ہونے سے پہلے ہی ہلاک کر دیا گیا تھا جبکہ باقی حملہ آوروں کو جوابی کارروائی میں ہلاک کیا گیا۔ جاری ہونے والے بیان میں سکیورٹی اہلکاروں کے کسی جانی نقصان کا ذکر نہیں کیا گیا۔

تحریک جہاد پاکستان (ٹی جے پی) نے اس حملے کی ذمہ داری قبول کر لی ہے۔ یہ جہادی گروپ رواں سال ہی منظر عام پر آیا ہے اور اس کے روابط تحریک طالبان پاکستان (ٹی ٹی پی) کے ساتھ ہیں۔  اس کے بارے میں زیادہ معلومات دستیاب نہیں ہیں۔

تاہم اس گروپ نے ملک میں کئی بڑے حملے کیے ہیں، جن میں جولائی کے دوران بلوچستان میں ایک پاکستانی فوجی اڈے پر 12 فوجیوں کو ہلاک کرنا بھی شامل ہے۔

ایئربیس کے قریب رہنے والے افراد کا کہنا ہے کہ ہفتے کو صبح سویرے ان کی آنکھیں فائرنگ کی آوازیں سن کر کھلیں۔ میانوالی کے ایک رہائشی ذیشان نیازی کا نیوز ایجنسی روئٹرز سے گفتگو کرتے ہوئے کہنا تھا، میں صبح تین بجے کے قریب اس وقت بیدار ہوا، جب شدید فائرنگ کا سلسلہ جاری تھا اور یہ صبح سات بجے تک جاری رہا۔‘‘

فوج کی طرف سے جاری ہونے والے بیان میں مزید کہا گیا ہے، ''پاک فضائیہ کے کسی بھی فنکشنل آپریشنل اثاثوں کو کوئی نقصان نہیں پہنچا۔ اس دوران صرف تین غیر آپریشنل طیاروں کو کچھ نقصان پہنچا ہے۔‘‘

یہ حملہ ایک ایسے وقت میں ہوا ہے، جب اسلام آباد حکومت نے غیر رجسڑڈ افغان مہاجرین کو ملک بدر کرنے کا سلسلہ شروع کر رکھا ہے۔

ا ا / ش خ (روئٹرز، اے ایف پی)