لاہور میں مون سون کی طوفانی بارشیں
پاکستان کے دوسرے سب سے بڑے شہر اور ثقافتی مرکز لاہور میں شدید بارشوں نے نظام زندگی مفلوج کر دیا ہے۔ ان دنوں ہونے والی بارشوں نے گزشتہ کئی برسوں کے ریکارڈ توڑ دیے۔
سڑکیں تالاب بن گئیں
پاکستان میں مون سون کی بارشوں کا طوفانی سلسلہ جاری ہے۔ ملک کا دوسرا بڑا شہر لاہور بھی ان بارشوں کی وجہ سے اربن فلڈنگ کی زد میں ہے۔ تازہ ترین برساتی سلسلے کی وجہ سے لاہور کی سڑکیں بھی تالاب کا منظر پیش کرتی رہیں۔
انڈرپاس زیرآب
لاہور میں ہونے والی شدید بارش کی وجہ سے کئی انڈر پاسز میں پانی کھڑا ہو گیا اور ٹریفک کی روانی متاثر ہوئی۔
نشیبی علاقے سیلاب کی زد میں
بارش اتنی شدید تھی کہ نشیبی علاقوں میں پانی گھروں میں داخل ہو گیا اور سڑکیں اور گلیاں برساتی پانی سے بھر گئیں۔ بجلی کا کرنٹ لگ جانے کی وجہ سے متعدد افراد کو ہسپتالوں میں بھی داخل کرایا گیا ہے۔
ریکارڈ بارشیں
لاہور کے علاقے تاجپورہ میں دو سو اڑتیس ملی میٹر بارش ہونے کی وجہ سے زندگی کے معمولات معطل ہو کر رہ گئے۔ اس علاقے کی مارکیٹوں میں پانی کھڑا ہونے کی وجہ سے کاروبار بری طرح متاثر ہوا۔
نظام زندگی مفلوج
اربن فلڈنگ کا باعث بننے والی مون سون کی طوفانی بارشوں کی وجہ سے نشیبی علاقے زیر آب آ چکے ہیں اور لوگوں کی نقل و حرکت بھی متاثر ہو رہی ہے۔
مزید بارشوں کی پیش گوئی
قدرتی آفات سے نمٹنے کے سرکاری صوبائی ادارے پی ڈی ایم اے نے رواں ہفتے (اکیس سے چھبیس جولائی تک) لاہور میں شدید بارشوں کے حوالے سے الرٹ جاری کیا ہے اور تمام متعلقہ اداروں کو ضروری احتیاطی تدابیر اختیار کرنے کے لئے کہا ہے۔
وارسا کا عملہ متحرک
لاہور اور اس کے گردونواح میں مزید بارشوں کی پشین گوئی کے باعث واسا کے عملے کو ہمہ وقت تیار رہنے اور متاثرہ علاقوں سے بارشی پانی کے جلد نکاس کو یقینی بنانے کی ہدایت کی گئی ہے۔