غار میں پھنسے نوجوانوں میں سے چار کو نکال لیا گیا
8 جولائی 2018تھائی لینڈ کے شمالی حصے میں سیلاب سے متاثرہ ایک غار میں سے چار نو عمر کھلاڑیوں کو آج اتوار آٹھ جولائی کو نکال لیا گیا ہے۔ خبر رساں ادارے روئٹرز کے مطابق یہ بات ریسکیو آپریشن میں مصروف میڈیکل ٹیم کے ایک سینیئر رُکن نے بتائی ہے۔ یہ افراد دو ہفتوں سے زائد وقت سے اس غار میں پھنسے ہوئے تھے۔
’’وائلڈ بورز‘‘ نامی فٹبال ٹیم کے 11 سے 16 برس کی عمر کے 12 لڑکے اور ان کا فٹبال کوچ ہفتہ 23 جون کو لاپتہ ہو گئے تھے۔ کوچ کی عمر 25 برس ہے۔ یہ افراد ایک غار میں اُس وقت پھنس کر رہ گئے تھے جب سیلاب کے سبب داخلی راستہ بند ہو گیا۔ لاپتہ ہونے کے بعد نو دنوں تک ان تمام لوگوں سے کوئی رابطہ نہیں ہو سکا تھا۔
ان کی تلاش کے لیے بڑے پیمانے پر کوششیں شروع کی گئیں جبکہ شدید بارشوں اور سیلاب کے سبب امدادی کاموں کی راہ میں رکاوٹیں بھی پیدا ہوئیں۔ تھائی لینڈ کے شمالی حصے میں واقع لوانگ نامی غار کے ان حصوں تک پہنچنے والے راستے بھی بند ہو گئے تھے جن کے بارے میں خیال تھا کہ یہ لاپتہ افراد وہاں موجود ہو سکتے ہیں۔
تاہم پیر دو جولائی کو صوبہ چیانگ رائے کے گورنر نے میڈیا کو بتایا کہ ان 13 افراد کو تلاش کر لیا گیا تھا۔ تاہم سیلابی پانی کے سبب راستے کی بندش اور غار میں پھنسے ان افراد کی طبی حالت کے پیش نظر ان کو وہاں سے نکالنے کے آپریشن کے لیے مناسب وقت کا انتظار کیا جا رہا تھا۔
آج اتوار آٹھ جولائی کو امدادی کارروائی کے نگران نارونگ سک اوسوتاناکورن نے صحافیوں کو بتایا کہ غار میں پھنسے نوجوان اب اس آپریشن کے لیے تیار ہیں۔ ان کے بقول مزید بارشوں کی پیشن گوئی کی وجہ سے امدادی ٹیم کے پاس محدود وقت ہے۔ اس موقع پر غار کے پاس ذرائع ابلاغ کے تمام کیمپوں کو ہٹا دیا گیا تھا۔
ا ب ا / ع ح (روئٹرز، ڈی پی اے)