'عدالتی فیصلے میں سقم ہیں‘

خبر رساں ادارے روئٹرز نے پاکستانی وزیر اعظم کی معاون خصوصی اطلاعات فردوس عاشق اعوان کے حوالے سے بتایا ہے کہ حکومت کی قانونی ٹیم کے مطابق آمر جنرل پرویز مشرف کی سزا کے عدالتی فیصلے میں 'کمزوریاں اور سقم‘ پائے جاتے ہیں۔ انہوں نے مزید کہا کہ وکلاء نے بدھ کو رات گئے وزیر اعظم عمران خان کو اس عدالتی فیصلے پر بریفنگ دی۔

دبئی میں زیر علاج 76 سالہ مشرف نے اس عدالتی فیصلے کو سیاسی قرار دیتے ہوئے مسترد کر دیا ہے۔ انہوں نے کہا ہے کہ اس عدالتی فیصلے کے خلاف اپیل دائر کی جائے گی۔ پاکستان کی ایک خصوصی عدالت نے سنگین غداری کے ایک مقدمے میں منگل کے دن مشرف کو سزائے موت سنائی تھی۔

جمعرات کو جاری کردہ تفصیلی فیصلے میں کہا گیا ہے کہ پاکستان کی کور کمانڈرز کمیٹی کے ساتھ ساتھ وہ تمام حاضر سروس فوجی بھی مشرف کے جرم میں برابر کے شریک ہیں، جو اس وقت مشرف کے ساتھ تھے یا ان کی حفاظت پر مامور تھے۔

اس عدالتی فیصلے میں جسٹس وقار احمد سیٹھ نے لکھا کہ اگر مشرف مردہ حالت میں بھی ملیں، تو ان کی لاش کو ڈی چوک پر لا کر تین دن تک لٹکایا جائے۔ تاہم اس خصوصی عدالت کے دو دیگر ججوں نے اس بات سے اختلاف کیا۔

جسٹس وقار احمد سیٹھ نے حکومت پر زور دیا ہے کہ وہ مشرف کے ساتھیوں کی نشاندہی کرے اور ان کے خلاف مقدمات درج کیے جائیں۔ مزید کہا گیا ہے کہ ایسے لوگوں کے خلاف بھی قانونی کارروائی کی جائے، جنہوں نے مشرف کو پاکستان سے باہر جانے کی اجازت دی تھی۔

اس عدالتی فیصلے پر پاکستانی فوج کی طرف سے شدید ردعمل ظاہر کیا گیا۔ عدلیہ اور فوج کے مابین اس تازہ کشیدگی میں اٹارنی جنرل انور منصور نے فوج کے بیان کی حمایت کر دی ہے۔ انہوں نے کہا کہ اس مقدمے میں مشرف کے خلاف کارروائی منصفانہ طور پر نہیں کی گئی۔

یہ تازہ پیش رفت ایک ایسے وقت پر ہوئی ہے، جب ملکی سپریم کورٹ نے حال ہی میں حکومت کی طرف سے آرمی چیف جنرل قمر جاوید باجودہ کو دی جانے والی مدت ملازمت میں تین سالہ توسیع پر اعتراضات کیے تھے۔

ع ب / م م / خبر رساں ادارے