ضمنی انتخابات: پولنگ ختم، گنتی شروع

مقامی میڈیا کے مطابق اتوار کے دن ضمنی انتخابات کا مرحلہ ختم ہونے کے بعد ووٹوں کی گنتی کا عمل جاری ہے اور پیر کے دن نتائج سامنے آ جائیں گے۔

ضمنی انتخابات کے لیے پولنگ کا عمل مقامی وقت کے مطابق شام پانچ بجے تک جاری رہا۔ اس ضمنی الیکشن میں پہلی مرتبہ سمندر پار پاکستانی ووٹرز نے بھی اپنا حق رائے دہی استعمال کیا۔

پاکستان میں جولائی میں منعقد ہوئے الیکشن میں قومی اور صوبائی اسمبلیوں میں خالی ہونے والی نشستوں کے علاوہ ان حلقوں پر بھی رائے شماری کا اہتمام کیا گیا، جہاں کسی وجہ سے الیکشن کا عمل ملتوی کرنا پڑ گیا تھا۔

پول جائزوں کے مطابق پاکستان مسلم لیگ کے خواجہ سعد رفیق اور شاہد خاقان عباسی اپنے اپنے حلقوں میں برتری حاصل کیے ہوئے ہیں۔ ان ضمنی انتخابات میں قومی اسمبلی کی ان چار نشستوں پر بھی الیکشن ہوا، جو عمران خان نے چھوڑی تھیں۔

صوبائی اسمبلیوں کی جن نشستوں پر ووٹنگ کا اہتمام کیا گیا، ان میں پنجاب اسمبلی کی گیارہ، خیبر پختونخوا اسمبلی کے نو جبکہ سندھ اور بلوچستان اسمبلیوں کے دو، دو حلقوں میں پولنگ منعقد کی گئی۔ صوبائی اسمبلیوں کی نشستوں پر ہوئی پولنگ میں تقریبا چھ سو امیدوار میدان میں اترے۔

ع ب / ش ح / خبر رساں ادارے