باویریا میں انتخابات، جرمن چانسلر کی قیادت کے لیے کتنے اہم؟

ذرائع ابلاغ سے منسلک مبصرین  کے ایک گروپ’ اؤبر میڈین‘ نے گزشتہ ماہ انکشاف کیا کہ انگیلا میرکل کے ’دور کے آغاز اور اختتام‘ سے متعلق 2001ء یعنی اس وقت سے ہی رپورٹیں شائع کی جا رہی ہیں، جب انہیں کرسچن ڈیموکریٹک یونین ( سی ڈی یو) کی پہلی خاتون سربراہ بنے ابھی ایک سال گزرا تھا۔

 میرکل کو اس دوران کئی چیلنجز کا سامنا بھی رہا ہے۔ اس کی تازہ مثال گزشتہ ماہ کی ہے، جب ان کے ایک قریبی ساتھی فولکر کاؤڈر کو قدامت پسند یونین جماعتوں نے مشترکہ پارلیمانی حزب کے سربراہ کے لیے منتخب نہیں کیا۔

کاؤڈر کی جگہ قدرے غیر معروف رالف بِرکن ہاؤس کے اس عہدے کے لیے منتخت ہونے کو کچھ حلقے اس امر کی نشانی کے طور پر بھی دیکھ رہے ہیں کہ میرکل کی جماعت میں ان کی حمایت کم ہوتی جا رہی ہے۔

گزشتہ ہفتے شمالی شہر کیل میں سی ڈی یو کے یوتھ ونگ کا سالانہ اجلاس ہوا، جس میں نوجوان رہنما پاؤل زیمیئک نے میرکل سے پارٹی کو جدید خطوط پر استوار کرنے کا مطالبہ کیا۔ اس موقع پر صوبہ باویریا میں سی ڈی یو کی ہم خیال جماعت کرسچن سوشل یونین ( سی ایس یو) کے ایک رہنما نے میرکل کو مخاطب کرتے ہوئے کہا کہ انہیں اس بات کا یقین نہیں ہے کہ میرکل  کی قیادت میں پارٹی آگے بڑھ سکتی ہے۔

چند سیاسی مبصرین کی رائے میں  چودہ اکتوبر کو باویریا میں جبکہ اٹھائیس اکتوبر کو ہیسے میں ہونے والے ریاستی انتخابات کے نتائج اگر سی ڈی یو اور سی ایس یو کے بہت زیادہ حق میں نہیں آتے تو چانسلر انگیلا میرکل کو پارٹی قیادت کے حوالے سے مشکلات کا سامنا کرنا پڑ سکتا ہے۔ سی ڈی یو کا پارٹی اجلاس دسمبر میں ہیمبرگ میں ہو گا اور ممکن ہے کہ پارٹی قیادت کے لیے میرکل کے مخالف کوئی امیداور سامنے آئے۔ اس پارٹی کانفرنس میں میرکل کو پارٹی سربراہ کے طور پر دوبارہ منتخب کیا جائے گا۔