شناختی کارڈ ساتھ نہ لانے کے باعث نواز شریف ووٹ نہ ڈال سکے

پاکستان کے مختلف نجی نشریاتی اداروں کے مطابق نواز شریف لاہور میں قومی اسمبلی کے حلقہ این اے 124 کے ایک پولنگ اسٹیشن پر پہنچے، جہاں سے مسلم لیگ ن کے سیاستدان اور سابق وزیر اعظم شاہد خاقان عباسی قومی اسمبلی کی اس نشست کے لیے امیدوار تھے۔ جب نواز شریف اس پولنگ اسٹیشن پر پہنچے تو ان کی بیٹی مریم نواز اور شاہد خاقان عباسی بھی ان کے ہمراہ تھے۔

تاہم  جب نواز شریف نے اپنا ووٹ ڈالنا چاہا، تو پولنگ اسٹاف نے ان سے ان کا شناختی کارڈ طلب کیا لیکن نہ تو نواز شریف اور نہ ہی ان کے سٹاف کے پاس سابق وزیر اعظم کا شناختی کارڈ تھا۔ یوں شناختی کارڈ نہ ہونے کے باعث نواز شریف اپنا ووٹ نہ ڈال سکے۔

اس واقع کی ویڈیوز اور تصاویر بھی سوشل میڈیا پر کافی زیادہ شیئر کی گئیں۔