شام کی صورتحال پر یورپی ممالک کی تشویش

سلامتی کونسل میں یورپی ممالک نے روس اور ایران سے مطالبہ کیا کہ آج جمعے کو تہران میں ہونے والے شامی مذاکرات میں جنگ بندی پر عمل درآمد کو یقینی بنانےکے موضوع پر بات چیت کی جائے۔

مشترکہ بیان

برطانیہ، فرانس، سویڈن، پولینڈ اور ہالینڈ کے ایک مشترکہ بیان میں کہا گیا کہ شمال مغربی شامی صوبے ادلب میں فوجی کارروائی شہری آبادی کے لیے تباہ کن ثابت ہو سکتی ہے۔ جرمنی، بیلجیم اور اٹلی نے بھی اس دستاویز پر دستخط کیے ہیں۔

اسد حکومت صوبہ ادلب میں ایک بڑا آپریشن کرنے کا ارادہ رکھتی ہے۔

اس بیان میں مزید کہا گیا کہ  باغیوں کے گڑھ ادلب میں شامی حکومت کی کارروائی سے وہاں رہنے والے تیس لاکھ افراد کی زندگی کو شدید خطرات لاحق ہو جائیں گے اور ان میں تقریباً دس لاکھ بچے ہیں، ’’دمشق حکومت اور اس جنگ کے دیگر فریقین کو مقامی آبادی کو تحفظ فراہم کرنا چاہیے اور یہ بھی یقینی بنانا چاہیے کہ انسانی بنیادوں پر کی جانے والی امداد کا راستہ بھی نہ روکا جائے۔‘‘

تہران میں ملاقات

جمعے کے دن دن شام کے موضوع پر دو اجلاس ہو رہے ہیں۔ تہران میں روس، ترکی اور ایران کے صدور مل رہے ہیں جبکہ سلامتی کونسل کے آٹھ یورپی ممالک کے نمائندے نیو یارک میں اس موضوع پر بحث کریں گے۔

حسن روحانی، ولادی میر پوٹن اور رجب طیب ایردوآن کی اس ملاقات میں یہ طے ہو گا کہ آیا سفارت کاری فوجی آپریشن کا راستہ روک سکتی ہے۔ تاہم یہ بات بھی قابل ذکر ہے کہ ان تینوں ممالک کے شام کے حوالے سے مفادات ایک دوسرے سے مختلف ہیں۔ روس اور ایران دمشق حکومت کا حامی ہے جبکہ ترکی اسد کے مخالف لڑنے والے باغیوں کی پشت پناہی کر رہا ہے۔

یونیسیف کی اپیل

اقوام  متحدہ کے ادارہ برائے اطفال یونیسیف نے شامی بچوں کے لیے ہنگامی امداد کی اپیل کی ہے۔ یونیسیف کے مطابق عالمی براداری کی جانب رقوم کی فراہمی میں کمی کی وجہ سے اردن میں پناہ لیے ہوئے شامی بچوں کے تعلیم وتربیت کے مختلف منصوبوں میں بھی تعطّل کا امکان بڑھ گیا ہے۔ یونیسیف کے مطابق اگر یہ پروگرام بند کر دیے گئے تو اس طرح کم از کم ساٹھ ہزار بچے متاثر ہوں گے۔