سہ فریقی ٹورنامنٹ: پاکستان نے پہلا ٹی ٹوئنٹی جیت لیا

اتوار کے دن زمبابوے کے دارالحکومت ہرارے میں کھیلے گئے پہلے ٹی ٹوئنٹی میچ میں پاکستان نے ٹاس جیت کر پہلے بلے بازی کا فیصلہ کیا اور مقررہ بیس اوورز میں چار کھلاڑیوں کے نقصان پر 182 رنز بنائے۔

پاکستان کی طرف سے اوپنر فخر زمان نے اپنے مخصوص جارحانہ انداز میں کھیلتے ہوئے شاندار نصف سنچری بنائی۔ انہوں نے تین چھکوں اور تین چوکوں کی مدد سے چالیس گیندوں پر اکسٹھ رنز بنائے، جو اس فارمیٹ میں ان کا سب سے زیادہ اسکور بن گیا ہے۔

اس میچ میں محمد حفیظ کی واپسی ہوئی لیکن بلے کے ساتھ وہ ناکام رہے اور سات کے انفرادی اسکور پر پویلین لوٹ گئے۔ تاہم اس میچ میں انہوں نے پانچ گیندیں کرائیں اور دو وکٹیں سمیٹ لیں۔ ون ڈاؤن حسین طلعت دس اور ٹو ڈاؤن کپتان سرفراز احمد سولہ کے انفرادی اسکورز پر آؤٹ ہو گئے۔

تاہم بعد ازاں شعیب ملک نے فخر زمان کے ساتھ عمدہ کھیل کا مظاہرہ کیا اور 37 رنز کی ناقابل شکست اننگز کھیلی۔ فخر زمان کے آؤٹ ہونے کے بعد آصف علی کریز پر آئے اور انہوں نے آتے ہی جارحانہ انداز اختیار کیا اور چار چھکوں اور ایک چوکے کی مدد سے صرف اکیس گیندوں پر اکتیالیس رنز بنا ڈالے۔

یوں پاکستان کا مجموعی اسکور 182 تک پہنچ گیا۔ زمبابوے نے جب اپنی اننگز شروع کی تو سولومون مِرے اور ٹاریسائی موسوکانڈا کے علاوہ کوئی بلے باز پاکستانی بولنگ کے سامنے نہ ڈٹ سکا۔ ان دونوں نے بالترتیب ستائیس اور 43 رنز بنائے۔ یوں زمبابوے کے تمام کھلاڑی 17.5 اوورز میں 108 پر آؤٹ ہو گئے۔

پاکستان کی طرف سے حسن علی، محمد نواز، عثمان خان اور محمد حفیظ نے دو دو کھلاڑیوں کو آؤٹ کیا جبکہ شاداب خان کو ایک وکٹ ملی۔ اس میچ میں بہترین کارکردگی دکھانے پر فخر زمان کو بہترین کھلاڑی قرار دیا گیا۔

اس سہ فریقی ٹی ٹوئنٹی ٹورنامنٹ کا دوسرا میچ پاکستان اور آسٹریلیا کی ٹیموں کے مابین دو جولائی کو کھیلا جائے گا۔ اس ٹورنامنٹ کا فائنل آٹھ جولائی کو ہرارے میں ہی منعقد ہو گا۔