رہا ہونے والے بھارتی ماہی گیروں کی آنکھوں میں خوشی کے آنسو

بھارتی وزیر اعظم نریندر مودی کی جانب سے بنگلہ دیش میں پاکستان مخالف بیان کے باعث دونوں ممالک میں ایک بار پھر سے بیانات کی جنگ شروع ہو گئی تھی لیکن اس سے پہلے کہ الفاظ کی تلخی امن کے ماحول کے لیے خطرہ بنتی، پاکستان نے ایک بار پھر سے مثبت قدم اٹھایا۔

حکومت پاکستان نے جیل میں قید بھارتی ماہی گیروں کو رہا کرنے کا فیصلہ کیا، جو اب رہائی پا کر ریل کے ذریعے لاہور کے سفر پر گامزن ہو چکے ہیں، جہاں انہیں واہگہ باڈر پر بھارتی حکام کے حوالے کر دیا جائے گا۔

ڈسٹرک جیل ملیر کے سپرنٹنڈنٹ محمد حسن سہیتھو نے ڈوئچے ویلے سے گفتگو کرتے ہوئے کہا کہ حکومت نے 113 بھارتی ماہی گیروں کی رہائی کے احکامات دیے ہیں، جن میں 10 مسلمان قیدی بھی شامل ہیں جبکہ اب بھی جیل میں 361 بھارتی ماہی گیر قید ہیں۔

جیل سے رہائی پانے والے بھارتی ماہی گیروں کو کینٹ اسٹیشن کراچی سے ریل گاڑی میں سوار کرایا گیا۔ ماہی گیروں کے سفری اخراجات ایدھی فاؤنڈیشن نے فراہم کیے ہیں۔ فاؤنڈیشن کے رضاکاروں نے اسٹیشن پر ماہی گیروں میں تحائف بھی تقسیم کیے۔

رہائی پانے والا ریحان بھارتی ریاست گجرات سے تعلق رکھتا ہے۔ گھر سے روزگار کی تلاش میں گھر سے نکل کر جیل کی کال کوٹھری میں 9 ماہ گزارنے والے ریحان کی آنکھوں میں آنسو تھے مگر وہ خوش تھا۔ ریحان پاکستانی جیل حکام کے رویے سے تو مطمئن تھا لیکن اسے یہ شکوہ ضرور ہے کہ اگر دونوں ملک اپنے تعلقات بہتر کر لیں تو اس جیسے غریبوں کو جیل کا منہ نہ دیکھنا پڑے۔

رہائی پانے والا شنکر بھی جیل میں گزرے دنوں کو یاد کر کے آب دیدہ ہو گیا۔ شنکر نے بتایا کہ جیل حکام کا سلوک بہت اچھا تھا، ہولی پر رنگ کھیلنے کا انتظام بھی کیا گیا اور دیوالی پر مٹھائی بھی کھلائی گئی لیکن گھر والوں کی یاد بہت ستاتی تھی۔ اگر پاکستان اور انڈیا کے تعلقات بہتر ہو جائیں تو بغیر جرم کے جیل نہیں کاٹنا پڑے گی۔

شنکر خود تو گھر لوٹنے پر خوش ہے مگر اسے پیچھے رہ جانے والے اپنے ساتھیوں کی فکر ہے کہ نہ جانے وہ مزید کب تک جیل میں قید رہیں گے۔

معروف قلم کار اور تجزیہ کار مقتدٰی منظور کہتے ہیں کہ ماہی گیروں کو گرفتارکرنے اور پھر ان کی رہائی سے حالات میں بہتری کا تاثر دینے سے مسئلہ حل نہیں بلکہ اور پیچیدہ ہو گا۔

دونوں ممالک کی حکومتوں کو اپنے تنازعے کا کوئی مستقل حل تلاش کرنا ہو گا اور مستقل حل عوامی رابطوں سے ہی ممکن ہے۔ دونوں ملکوں کے درمیان عوامی رابطے جس قدر مستحکم ہوں گے، حالات اتنا ہی جلد بہتر ہو سکیں گے۔