جنسی جرائم کے خلاف احتجاجی کارروان نے اپنا سفر شروع کر دیا

جنسی زیادتی کے مجرمان کو عدالتوں میں جلد سے جلد سزائیں سنانے کا مطالبہ لے کر احتجاجی قافلے میں شریک سینکڑوں افراد نے سفر کا آغاز کر دیا ہے۔ اس قافلے کے شرکاء ملکی دارالحکومت نئی دہلی پہنچ کر حکام بالا پر دباؤ بڑھانے کی کوشش کریں گے کہ جنسی استحصال کے ملزمان کے مقدمات پر کارروائی جلد کی جائے اور جج صاحبان فیصلے جلد سے جلد کریں۔

دوسری جانب نئی دہلی حکومت کے اعداد و شمار کے مطابق سن 2007 سے سن 2016 کے دوران خواتین کے خلاف جرائم میں غیرمعمولی اضافہ دیکھا گیا ہے۔ ايسے جرائم تراسی فیصد تک بڑھ گئے ہيں۔ ان اعداد و شمار کے مطابق بھارت کے طول و عرض میں ہر گھنٹے میں چار خواتین کے ساتھ جنسی زیادتی کا ارتکاب کیا جاتا ہے۔

ممبئی سے شروع ہونے والے قافلے کے منتظمین کا کہنا ہے کہ راستے میں آنے والے شہروں اور قصبات میں بھی جنسی زیادتی و استحصال کے خلاف آگہی کا سلسلہ جاری رکھا جائے گا۔ ان منتظمین کا یہ بھی کہنا ہے کہ جنسی زیادتی کے معلومہ واقعات کا معاملہ تو عدالتوں تک پہنچتا ہے جب کہ کئی خواتین ریپ کے بعد معاشرتی بدنامی کے خوف کے تحت چپ چاپ زندگی بسر کر دیتی ہیں۔

حکومتی ریکارڈ کے مطابق سن 2015 میں پینتیس ہزار جنسی زیادتی کے واقعات پولیس کو رپورٹ کیے گئے۔ ان میں سے صرف سات ہزار ملزمان کو سزائیں سنائی گئیں اور بقیہ افراد عدم ثبوتوں اور ناکافی شواہد کی بنیاد پر رہا کر دیے گئے۔ یہ حیران کن حقیقت ہے کہ بھارت میں گزشتہ تین برسوں میں ریپ کے واقعات میں چالیس فیصد اضافہ بتایا جاتا ہے۔

اسی قافلے میں شریک ایک خاتون سومہت سنگھ سوڈھی نے بتایا کہ اس کی چار برس کی بیٹی کے ساتھ جنسی زیادتی کی گئی ہے اور وہ ابھی تک اُس صدمے سے باہر نہیں نکل سکی ہے۔ سوڈھی کی بیٹی کے ساتھ ریپ کا واقعہ رواں برس جون میں ہوا تھا۔ وہ بھی اپنی بیٹی کے ملزموں کے لیے عدالت سے انصاف کا مطالبہ کرنے کی خاطر ممبئی سے نئی دہلی روانہ ہونے والے قافلے میں شامل ہے۔

اس قافلے کا انتظام ایک ایڈووکیسی گروپ راشٹریہ گرائما ابھییان یا نیشنل پرائڈ موومنٹ نے کیا ہے۔ اس قافلے کے شرکاء بسوں کے ذریعے نئی دہلی تک کا سفر مختلف مقامات پر پڑاؤ ڈالتے ہوئے مکمل کریں گے۔ ان کی کوشش ہے کہ راستے میں بھی منتظمین مختلف شہروں اور قصبات کے انتظامی اہلکاروں اور کمیونٹی ورکروں کے ساتھ میٹنگیں کرتے ہوئے انہیں قائل کریں کہ جنسی زیادتی کے خلاف آواز پوری شدت کے ساتھ بلند کرنا وقت کی ضرورت ہے۔

یہ قافلہ ممبئی سے تقریباً دس ہزار کلومیٹر کی مسافت طے کرنے کے بعد نئی دہلی پہنچے گا۔ یہ سفر اگلے سال یعنی سن 2019 کے مہینے فروری کے آخر میں اختتام پذیر ہو گا۔