جارجیا کے 'فارن ایجنٹ' بل سے امریکہ ناراض کیوں ہے؟

امریکہ نے کہا ہے کہ وہ جارجیا کی پارلیمنٹ کی جانب سے اس ماہ کے اوائل میں ایک متنازع"غیر ملکی ایجنٹ" بل کی منظوری کی وجہ سے جنوبی قفقاز کے اس ملک پر نئی ویزا پابندیاں عائد کررہاہے اور اس کے ساتھ اپنے تعلقات نیز باہمی تعاون کا "جامع جائزہ" بھی لے رہا ہے۔

نئی ویزا پابندیاں کیا ہوں گی؟

امریکی وزیر خارجہ انٹونی بلنکن نے جمعرات کے روز کہا کہ یہ پابندیاں ان افراد پر نافذ ہوں گی جو جارجیا میں جمہوریت کو نقصان پہنچانے کے ذمہ دار ہیں،یا اس میں ملوث ہیں۔ یہ پابندیاں ان افراد کے اہل خانہ پر بھی عائد ہوں گی۔ انہوں نے کہا کہ واشنگٹن امریکہ اور جارجیا کے درمیان باہمی تعاون کے معاہدوں کا جامع جائزہ بھی شروع کررہا ہے۔

جارجیا: ’غیر ملکی ایجنٹس‘ کا متنازعہ بل واپس لے لیا گیا

جارجیا: روس میں شمولیت کے لیے جنوبی اوسیتیا نے ریفرنڈم کرانے کا اعلان کر دیا

بلنکن کا کہنا تھا،"جو کوئی بھی جارجیا میں اکتوبر 2024 کے مجوزہ انتخابات کے دوران اور اس کے بعد بھی جمہوری عمل یا جمہوری اداروں کو نقصان پہنچاتا ہے، وہ امریکی ویزوں کے لیے نااہل قرار دیا جاسکتا ہے۔"

بلنکن نے اس بات پر بھی زور دیا کہ،"جب ہم اپنے دونوں ملکوں کے درمیان تعلقات کا جائزہ لیں گے تو ہم فیصلہ کرتے وقت جارجیا کے اقدامات کو بھی مدنظر رکھیں گے۔"

جارجیا کا 'غیر ملکی ایجنٹ' قانون کیا ہے؟

 جارجیا کی پارلیمنٹ کی طرف سے منظور کردہ متنازعہ قانون کے تحت ایسی غیر سرکار ی تنظیموں (این جی اوز)اور میڈیا اداروں کو  ''غیر ملکی طاقتوں کے مفادات کو فروغ دینے والے "اداروں کے طور پر رجسٹر کیا جائے گا،جو 20فیصد سے زیادہ اپنی فنڈنگ بیرون ملک سے حاصل کرتے ہیں۔

روس اور جارجیا کے تنازعے پر فلم

بڑے پیمانے پر مظاہروں کے باوجود قانون سازوں نے گزشتہ ہفتے بل کو منظور کر لیا تھا۔ حکمران جارجین ڈریم پارٹی کا کہنا ہے کہ وہ این جی او زکی فنڈنگ میں شفافیت بڑھانے کے لیے کام کر رہی ہے۔

لیکن ناقدین کا کہنا ہے کہ یہ اپوزیشن گروپوں کو خاموش کرنے اور اس سابق سوویت جمہوریہ کو مغرب نواز روش سے دور کرکے روس کی طرف منتقل کرنے کی کوشش ہے۔

یہ قانون ابھی نافذ نہیں ہوا ہے کیونکہ جارجیا کے مغرب نواز صدر سلوم زورابیشویلی نے اسے ویٹو کر دیا ہے۔لیکن پارلیمنٹ کو ان کے ویٹو کو مسترد کر نے کا اختیار ہے۔

یورپی یونین نے بھی اس قانون پر کڑی تنقید کی ہے اور متنبہ کیا ہے کہ وہ اسے بلاک کا رکن بننے کی کوششوں میں پیچھے چھوڑ سکتا ہے۔

ج ا/ ص ز (اے ایف پی، ڈی پی اے)