بھارت کرتار پور راہداری کھولنے پر تیار

پاکستان بھارتی کابینہ کے آج کے اس فیصلے سے پہلے ہی سکھ یاتریوں کے لیے یہ راہداری کھولنے کا عندیہ دے چکا تھا تاہم آج پاکستان کے وزیر خارجہ شاہ محمود قریشی نے بھی اپنے ٹوئٹر پیغام میں کہا ہے کہ اسلام آباد حکومت بھی یہ نئی راہداری کھولنے کا فیصلہ کر چکی ہے اور سرحد پر پاکستانی حدود میں وزیراعظم عمران خان رواں ماہ خصوصی راہ داری گیٹ کا سنگ بنیاد رکھ دیں گے۔

سکھ پاکستان کو اپنے مذہب کی جائے پیدائش سمجھتے ہیں۔ سکھ مذہب کے بانی گرو نانک سن 1469ء میں لاہور کے قریب واقع ننکانہ صاحب میں پیدا ہوئے تھے۔ بھارت کی طرف سے جاری ہونے والے ایک بیان میں کہا گیا ہے، ’’حکومت پاکستان سے کہا جائے گا کہ وہ سکھ برادری کے جذبات کو تسلیم کرتے ہوئے اپنی سرزمین پر ایک کوریڈور تعمیر کرے  اور اُن کے لیے مناسب سہولیات فراہم  کرنے کا انتظام بھی کرے۔‘‘

پاکستان کا خیرمقدم

پاکستان کے وزیر برائے اطلاعات و نشریات فواد حسین نے اس حوالے سے ٹویٹ کرتے ہوئے لکھا ہے، ’’ کرتار پور راہداری کھولنے کے حوالے سے پاکستانی تجویز کی بھارتی کابینہ کی طرف سے توثیق دونوں ممالک میں امن کے لیے لابی کرنے والوں کی جیت ہے۔‘‘ ان کا مزید کہنا تھا کہ یہ صحیح سمت کی طرف ایک قدم ہے اور  اس سے سرحد کی دونوں اطراف میں عقل اور امن کی آواز کو حوصلہ ملے گا۔

بھارت سے آنے والے ہزاروں سکھ یاتری ہر سال گرودوارہ دربار صاحب کی زیارت کرتے ہیں لیکن بھارت کے خدشات ہیں کہ اس نئی سڑک کو پاکستان یا بیرون ملک مقیم علیحدگی پسند سکھ بھارت مخالف مہم کے لیے استعمال کر سکتے ہیں۔

ا ا / ع ح (روئٹرز)