بحیرہ روم میں دو بحری جہاز ٹکرا گئے

حکام نے آج پیر کو بتایا کہ اٹلی اور فرانس نے آلودہ پانی کو صاف کرنے اور اس حادثے کے بعد  تیل کو مزید پھیلنے سے روکنے کی کوششوں میں تعاون کے لیے اپنے اپنے جہاز روانہ کر دیے ہیں۔ اس بیان میں مزید بتایا گیاکہ یہ دونوں مال بردار جہاز فرانسیسی جزیرے کورسیکا کے قریب اتوار کے دن مقامی وقت کے مطابق صبح ساڑھے سات بجے ایک دوسرے سے ٹکرائے تھے۔

اس حادثے کے وجہ ابھی تک معلوم نہیں ہو سکی ہے۔ حکام نے بتایا کہ موسم اس ٹکراؤ کی وجہ نہیں ہو سکتا کیونکہ حادثے کے وقت سمندر میں نہ تو اونچی اونچی لہریں تھیں اور مطلع بھی بالکل صاف تھا۔

اس حادثے میں کسی کے بھی زخمی ہونے کی کوئی اطلاع نہیں ہے لیکن قبرصی جہاز ’سی ایل ایس ورجینیا ہل‘ میں کئی میٹر طویل ایک شگاف پڑ گیا ہے۔ فرانسیسی حکام نے بتایا کہ ورجینیا ہل سے مسلسل ایندھن بہہ رہا ہے تاہم اس بارے میں مزید تفصیلات نہیں بتائیں۔ حادثے کے وقت ورجینیا ہل پر سامان لدا ہوا نہیں تھا۔

 خبر رساں ادارے اے ایف پی کو بتایا گیا ہے کہ تیونس کے جہاز کی رفتار شاید اس کے رد عمل کی صلاحیت سے زیادہ  تیز تھی۔ بتایا گیا ہے کہ تیونس کا جہاز ’Ulysse‘ اطالوی بندرگاہ ’جنوا‘ سے تیونس سٹی کی قریبی شہر ’رادس‘ جا رہا تھا۔