ایم ایم اے کی الیکشن کمیشن کے کردار پر تنقید

سراج الحق نے اتوار کے دن کراچی میں جلسے سے قبل ڈوئچے ویلے سے گفتگو کرتے ہوئے نگران وزیر اعظم ناصر الملک کو مشورہ دیا ہے کہ وہ الیکشن میں فریق بننے کے بجائے نگرانی کا کام انجام دیں۔ سراج الحق کا کہنا تھا کہ کراچی 35 برسوں سے یرغمال تھا، پولنگ اسٹیشنوں پر ٹھپا مافیا کا راج ہوتا تھا لیکن مذہبی جماعتوں نے ہمت نہیں ہاری اور عوام کی خدمت کی۔

دہشت گردی کی حالیہ وارداتوں کے باعث سنی اور شعیہ مذہبی جماعتوں کے اس جلسے کے لیے سیکورٹی انتظامات انتہائی سخت تھے۔ ایس ایس پی نعمان صدیق کے مطابق جلسے میں شریک رہنماوں کو سکیورٹی خطرات ہیں اور ملک میں انتخابی اجتماعات پر جس انداز میں دہشت گردانہ حملے کیے گئے ہیں، ان کو مد نظر رکھتے ہوئے سیکورٹی انتظامات کیے گئے ہیں۔

انہوں نے کہا کہ  ایک ہزارسے زائد پولیس اہلکار میدان کے باہر تعینات کیے گئے جبکہ جلسہ شروع ہونے سے قبل بم ڈسپوزل اسکواڈ نے وقفے وقفے سے میدان کی کئی بار باریک بینی سے سرچنگ بھی کی جبکہ  تمام داخلی راستوں پر واک تھرو گیٹ نصب کئے گئے، جلسے میں آنے والے ہر شخص کو ان واک تھرو گیٹس سے گزرنے کے بعد جامہ تلاشی بھی دینی تھی۔

مبصرین کے مطابق پاکستان کے شہروں میں انتخابی مہم کے انداز تبدیل ہو رہے ہیں اور ملک گیر جماعتیں ٹی وی پر اشتہارات کے ذریعے مہم پر زیادہ توجہ دے رہی ہیں۔ لیاری میں بلاول کی ریلی کو پیش آنے والے ناخوش گوار واقعہ کے بعد سیاسی جماعتیں خصوصاٰ اقتدار میں رہنے والی جماعتیں ووٹرز کے ممکنہ ردعمل سے خوفزدہ بھی دکھائی دیتی ہیں۔ لہذا ان کی کوشش ہے کہ بڑے جلسوں کی بجائے اشتہارات کے ذریعے انتخابی مہم چلائی جائے جبکہ تحریک انصاف سوشل میڈیا کو بھی انتخابی مہم کے لیے استعمال کر رہی ہے.

پیپلز پارٹی، ایم کیو ایم اور مسلم لیگ نواز کی طرح متحدہ مجلس عمل کی جانب سے بھی الیکشن کمیشن کے کردار پر مسلسل تنقید اور اعتراضات کا اظہار کیا جا رہا ہے۔ ایم ایم اے کراچی کے صدر حافظ نعیم کہتے ہیں کہ تمام سیاسی جماعتوں کو انتخابات کے لیے یکساں ماحول اور مواقع فراہم نہیں کیے جا رہے، ضابطہ اخلاق کے حوالے سے اعتراض ہے کہ اگر انتخابات میں بینرز اور جھنڈے نہیں لگیں گے تو کب لگیں گے اور اگر جھندے اور بینرز اتارے جانے ہیں تو پھر سب کے اتارے جائیں۔ شہر میں کئی ایسے مقامات ہیں جہاں دیگر جماعتوں نے بینرز اور جھنڈے لگائے ہوئے ہیں۔ انہوں نے مزید کہا ٹی وی پر اشتہارات کے حوالے سے بھی ضابطہ اخلاق واضح ہونا چاہیے۔ بڑی جماعتیں تو کروڑوں روپے کی اشتہاری مہم چلا رہی ہیں اس کا بھی تو کوئی حساب کتاب ہونا چاہیے۔

تجزیہ کاروں کے مطابق کراچی میں اب تک سب سے زیادہ اور موثر انتخابی مہم متحدہ مجلس عمل نے ہی چلائی ہے، جس کی بنیادی وجہ جماعت اسلامی کا کراچی میں مضبوط اور مؤثر سیاسی سیٹ اپ ہے۔  ایم ایم اے کے کراچی سے انتخابات میں حصہ لینے والے زیادہ تر امیدوار بھی جماعت اسلامی سے ہیں اور جماعت اسلامی نے زیادہ تر ٹکٹ بھی اردو بولنے معروف رہنماوں کو ہی دیے ہیں جبکہ شہر کے بیرونی سرکل کی پشتوں آبادیوں پر جمعیت علما اسلام کا اثر رسوخ  زیادہ ہے، لہذا وہاں امیدوار جے یو آئی سے تعلق رکھتے ہیں۔

اہم بات یہ بھی ہے کہ ایم ایم اے کے امیدوار جن حلقوں سے میدان میں ہیں وہ ان ہی حلقوں کے رہائشی ہیں اور ووٹرز کئی برسوں سے انہیں دیکھ رہے اور جانتے ہیں کہ کس امیدوار نے ان کے مسائل کے حل کے لیے کیا کیا؟