ایشیائی بھڑوں نے جنوب مغربی بحرالکاہل کے خطے میں قدم جما لیے

بحر الکاہل کے جنوب مغرب میں بعض امریکی علاقوں اور کینیڈا کے صوبے برٹش کولمبیا میں مقامی حکام نے جارح مزاج ایشیائی بھڑوں (Hornets) کے خاتمے کی مہم شروع کر رکھی ہے۔ جاپانی ماہرین حیاتیات کا کہنا ہے کہ بھڑوں کا یہ 'قتلِ عام‘ سارے علاقے کے ایکو سسٹم پر واضح اثرات مرتب کرے گا۔ کینیڈین صوبے میں ان بھڑوں کے چھتوں کی نشاندہی سن 2019 میں کی گئی تھی۔ اسی طرح یہ امریکی ریاست واشنگٹن کے سرحدی علاقوں میں بھی پائی گئی ہیں۔

امریکا میں ’قاتل سرخ بِھڑ‘ کا اولین چھتہ

شہد کی مکھیوں کی دشمن

ایشیائی بھڑ کو برٹش کولمبیا کی شہد کی مکھیوں کی شدید دشمن قرار دیا جاتا ہے۔ سائنسی ماہرین کے مطابق چند ہارنیٹس یا بھڑیں مل کر پچیس سے تیس ہزار تک شہد کی مکھیوں کے ایک بڑے چھتے کو چند گھنٹوں میں اجاڑ دیتی ہیں۔

امریکی اور کینیڈین ماہرین حیاتیات کا خیال ہے کہ ان بھڑوں کے حملوں سے شہد کی مکھیوں کے کئی چھتے گزشتہ کئی مہینوں کے دوران ضائع ہو چکے ہیں۔

کینیڈا کے صوبے برٹش کولمبیا سے تعلق رکھنے والے علوم حشرات الارض کے ماہر نانائمو کا کہنا ہے کہ ایشیائی بھڑیں شہد کی علاقائی اور مقامی انڈسٹری کے لیے سنگین نقصان کا باعث ہو سکتی ہیں۔

جرمنی: بِھڑوں کا حملہ، 16 بچے ہسپتال

قاتل بِھڑ

ایشیائی بھڑ یا ہارنیٹ کی رنگت سیاہ ہونے کے علاوہ سرخ بھی ہوتی ہے۔ پاکستان اور بھارت میں بھی سرخ بھڑ پائی جاتی ہے۔ امریکا اور کینیڈا پہنچنے والی ہارنیٹس کے زہریلے ہونے کا اندازہ اس سے لگایا جا سکتا ہے کہ صرف جاپان میں اس کے کاٹنے سے ہر سال تیس سے پچاس تک افراد ہلاک ہو جاتے ہیں۔

دوسری جانب امریکا میں زرد بھڑوں اور شہد کی مکھیوں کے کاٹنے سے سالانہ اوسط ہلاکتیں باسٹھ کے قریب رہتی ہیں۔

ایشیائی تُند مزاج بھڑ

امریکا اور کینیڈا میں چھتے بنانے والی زور دار ڈنک والی بھڑوں کا تعلق جاپان اور جزیرہ نما کوریا سے ہے۔ اس کے علاوہ کئی اور ایشیائی ممالک میں بھی یہ بھڑیں کثرت سے پائی جاتی ہیں۔ ان بھڑوں میں جوان نر کی زیادہ سے زیادہ لمبائی ساڑھے چار سینٹی میٹر (1.7 انچ) تک ہو سکتی ہے۔ ان بھڑوں کے ڈنک کی لمبائی چھ ملی میٹر (0.2 انچ) تک ہوتی ہے۔

بھڑ کے کاٹےکا علاج ’کانٹے‘ سے

ایشیائی بھڑوں کے چھتے اکثر گھنے جنگلات یا سوکھے درختوں کے تنوں میں دیکھے جا سکتے ہیں۔ ایسی بھڑوں کے چھتوں کی جسامت چھوٹے ہونے کے ساتھ ساتھ خاصی بڑی بھی ہو سکتی ہے۔

جولین رایل، ٹوکیو (ع ح / م م)