اپنے ملک کا خیال رکھو، شاہ کا خان کو مشورہ

پاکستانی وزیر اعظم عمران خان کی طرف سے نصیر الدین شاہ کا نام لے کر بھارت میں اقلیتوں کی صورتحال پر ایک بیان دینے پر نصیر الدین شاہ نے سخت ردعمل ظاہر کیا ہے۔ نصیر الدین شاہ کے مطابق عمران خان کو پاکستان کے معاملات پر ہی توجہ مرکوز رکھنا چاہیے۔

بالی ووڈ کے معروف اور مقبول اسٹار نصیر الدین شاہ نے کہا ہے کہ بھارت میں گزشتہ ستر برسوں سے جمہوریت کا راج ہے اور اس ملک کے لوگ جانتے ہیں کہ اپنا خیال کیسے رکھنا ہے۔

نصیر الدین شاہ نے ’سنڈے ایکسپریس‘ سے گفتگو میں  کہا کہ مسٹر خان کو ان وعدوں کو پورا کرنا چاہیے، جو انہوں نے طاقت ملنے سے قبل کیے تھے اور انہیں ایسے معاملات کے بارے میں رائے نہیں دینا چاہیے، جن کا ان سے کوئی تعلق نہیں بنتا۔

 نصیرالدین شاہ نے یہ بیان پاکستانی وزیر اعظم عمران خان کے اس بیان کے تناظر میں دیا ہے، جس میں عمران خان نے نصیر الدین شاہ کے ایک بیان کے تناظر میں کہا تھا کہ بھارت میں اقلیتوں کے حالات واقعی بہتر نہیں ہیں۔

انہوں نے مزید کہا تھا کہ وہ بھارتی وزیر اعظم نریندر مودی کو بتائیں گے کہ اقلیتوں کا خیال کیسے رکھا جاتا ہے۔ عمران خان کے مطابق ان کی حکومت ایسے اقدامات اٹھا رہی ہے، جن سے اقلیتوں کو برابری حقوق میسر آ سکیں گے۔

نصیر الدین شاہ نے حال ہی میں ایک بیان میں کہا تھا کہ بھارت میں عدم برداشت میں اضافہ ہو رہا ہے اور وہ اپنے بچوں کے مستقبل کے بارے میں پریشان ہیں۔ انہوں نے کہا تھا کہ ’اگر کل کوئی میرے بچوں کو روک کر پوچھے کہ تم ہندو ہو یا مسلمان۔ تو ان کے پاس اس سوال کا کوئی جواب نہیں ہو گا‘۔

اس بیان پر بھارت میں نصیرالدین شاہ کو شدید تنقید کا نشانہ بنایا جا رہا تھا تاہم پاکستانی وزیر اعظم عمران خان کی طرف سے اس بارے میں نصیر الدین شاہ کا براہ راست نام لے کر بیان دینا، نصیرالدین شاہ کے لیے زیادہ پریشانی کا باعث بن گیا۔

اسی طرح پاکستان میں مختلف حلقوں نے بھی نصیر الدین شاہ کا حوالہ دیتے ہوئے بھارت میں مذہبی عدم برداشت پر بیانات دیے۔ انہی میں شیری رحمان بھی شامل ہیں، جنہوں نے اپنے ایک ٹوئٹ میں لکھا۔