اوسلو: نواز شریف اور ملالہ کی باقاعدہ ملاقات

پاکستانی وزیر اعظم نواز شریف کے مطابق اگر سترہ سالہ ملالہ یوسف زئی نے وطن واپس آنے کا منصوبہ بنایا تو ان کی حکومت اس سلسلے میں ہر طرح کا تعاون کرے گی۔ ملالہ کے بقول اس موقع پر وزیراعظم نے کہا کہ ’’ آپ کا ملک ہمیشہ آپ کا ہی رہے گا، جس پر میں نے جواب دیا کہ بطور ایک پاکستانی یہ میری ذمہ داری ہے کہ میں وطن واپس آکر اپنے شہریوں کی مدد کروں‘‘۔

ناروے کے مقامی نشریاتی ادارے ’این آر کے‘ سے باتیں کرتے ہوئے ملالہ نے مزید کہا کہ وہ اپنے اسکول کی چھٹیوں میں ہی کوئی پروگرام بنا سکتی ہیں۔ انہوں نے مزید بتایا کہ وزیر اعظم شریف سے ملاقات کے دوران بچوں سے جبری مشقت اور کم عمری میں شادی جیسے موضوعات پر بھی بات ہوئی۔

وزیراعظم نواز شریف نے اپنے ٹوئٹر اکاؤنٹ پر ملالہ کے ساتھ ملاقات کی تصویر بھی جاری کی ہے۔ نواز شریف اور ملالہ کے مابین اس سے قبل ستمبر 2013ء میں اقوام متحدہ کے عام اجلاس کے موقع پر ایک رسمی سے ملاقات ہوئی تھی۔ تاہم یہ پہلی مرتبہ ہے کہ یہ دونوں باقاعدہ طور پر ملے ہیں۔

اوسلو میں تعلیم کے فروغ کے موضوع پر اقوام متحدہ کے دو روزہ اجلاس سے ملالہ نے اپنے خطاب کرتے ہوئے عالمی رہنماؤں سے بچوں کو بارہ سال تک مفت تعلیم مہیا کرنے کا مطالبہ بھی کیا ہے۔ ’’ اگر نو سال کی اسکولنگ آپ کے بچے کے لیے کافی نہیں ہے تو یہ دنیا کے ہربچےکے لیے بھی ناکافی ہے‘‘۔

چھ اور سات جولائی کو ہونے والے اس اجلاس میں دنیا بھر میں ان 59 ملین بچوں کے مستقبل پر بات کی گئی، جو بنیادی تعلیم سے محروم ہیں یا اسکول نہیں جاتے۔ ملالہ نے تعلیم کے لیے رقم کی کمی کے بہانے کو تسلیم کرنے سے انکار کرتے ہوئے کہا کہ جنگوں اور دیگر اہداف کے حصول پر اٹھنے والے اخراجات میں کمی کی جائے ’’دنیا بھر میں عسکری شعبے پر گزشتہ آٹھ برسوں کے دوران انتالیس ارب ڈالر خرچ کیے گئے‘‘۔

نواز شریف اور ان کے بھارتی ہم منصب نریندر مودی نے گزشتہ برس امن کے نوبل انعام کی تقریب میں شرکت نہیں کی تھی۔ ملالہ اور بھارتی شہری کیلاش ستیارتھی کو مشترکہ طور پر امن کا نوبل انعام دیا گیا تھا۔