پاکستان کی پہلی خاتون بین الاقوامی کرکٹ ایمپائر کون ہیں؟

پاکستان کرکٹ بورڈ (پی سی بی) نے کہا ہے کہ سلیمہ امتیاز انٹرنیشنل کرکٹ کونسل (آئی سی سی) کے بین الاقوامی پینل آف ڈویلپمنٹ امپائر میں نامزد ہونے والی پہلی پاکستانی خاتون بن گئی ہیں۔ امتیاز کی پینل میں نامزدگی کا مطلب ہے کہ وہ اب خواتین کے بین الاقوامی میچوں اور خواتین کے لیے آئی سی سی کے ایونٹس میں امپائرنگ کرنے کی اہل ہیں۔

اپنی نامزدگی کے بعد سلیمہ امتیاز نے ایک بیان میں کہا، ''یہ صرف میری جیت نہیں ہے یہ پاکستان میں ہر خاتون کرکٹر اور امپائر کی جیت ہے۔ مجھے امید ہے کہ میری اس کامیابی سے ان بے شمار خواتین کی حوصلہ افزائی ہوئی ہو گی، جو کرکٹ کے کھیل میں اپنی شناخت بنانے کا خواب دیکھتی ہیں۔‘‘

ان کا مزید کہا تھا، ''یہ لمحہ کرکٹ میں خواتین کے بڑھتے ہوئے اثر و رسوخ اور اس ترقی کو فروغ دینے کے لیے پی سی بی کے عزم کی عکاسی کرتا ہے۔‘‘ سلیمہ امتیاز کی بیٹی کائنات پاکستان کے لیے 40 بین الاقوامی کرکٹ میچز کھیل چکی ہیں، جن میں 19 ایک روزہ اور 21 ٹی ٹوئنٹی شامل ہیں۔

 امتیاز نے کہا کہ جب سے ان کی بیٹی نے 2010 میں جنوبی افریقہ کے خلاف بین الاقوامی کرکٹ میں ڈیبیو کیا تھا، تب سے وہ ہمیشہ سے ہی امپائرنگ کے میدان میں بین الاقوامی سطح پر اپنا نام بنانا چاہتی تھیں۔ انہوں نے کہا، ''مجھے ایشین کرکٹ کونسل کے ساتھ کام کرنے کے مواقع ملے ہیں لیکن اعلیٰ سطح پر کام کرنا ہمیشہ ہی اہم  رہا ہے۔‘‘

سلیمہ امتیاز نے 2008 میں پی سی بی کے ویمنز امپائرز پینل میں شمولیت اختیار کی اور وہ گزشتہ تین سالوں میں ایشین کرکٹ کونسل کے متعدد ٹورنامنٹس میں امپائرنگ کر چکی ہیں۔ امتیاز  کی کسی بین الاقوامی سیریز میں پہلی آن فیلڈ تقرری پاکستانی اور جنوبی افریقہ کی ٹیموں کے مایبن  تین میچوں کی ٹی ٹوئنٹی سیریز میں کی گئی ہے۔ یہ سیریز سولہ ستمبر سے ملتان میں شروع ہوئی ہے۔

 ش ر⁄ ع ا (اے پی)