نئے قرض کے لیے آئی ایم ایف کی تمام شرائط پوری ہیں، پاکستان

پاکستان کے وزیر اعظم شہباز شریف نےکہا ہے کہ ان کے ملک نے اپنی معیشت کو سہارا دینے کے لیے بین الاقوامی مالیاتی فنڈ (آئی ایم ایف) سے  سات بلین ڈالر کے نئے قرضے کے حصول کے لیے مقرر کردہ تمام شرائط کو پورا کر لیا ہے۔

شہباز شریف نے جمعرات کو وفاقی کابینہ کے اجلاس کے دوران آئی ایم ایف کی طرف سے مقرر کردہ تقاضوں کی تعمیل کرنے کے لیے اپنی فنانس ٹیم اور دیگر  مشیروں کی تعریف کی۔ آئی ایم ایف سے پاکستان کو قرض کی فراہمی کے لیے 25 ستمبر کو اس عالمی قرض دہندہ ادارے کے بورڈ آف ایگزیکیٹو ڈائریکٹرز کی میٹنگ میں باقاعدہ منظوری دیےجانے کی توقع ہے.

 شہباز شریف نے بیل آؤٹ پیکج کو یقینی بنانے میں پاکستان کی مدد کرنے پر چین کا خصوصی طور پر شکریہ ادا کیا لیکن اس بارے میں مزید تفصیلات فراہم نہیں کیں۔ آئی ایم ایف نے پاکستان سے کہا تھا کہ وہ ملک کے ٹیکس کی بنیاد کو وسیع کرے اور توانائی کے ذریعوں یعنی گیس، بجلی اور پیٹرول پر دی جانے والے سبسڈی  ختم کرے۔

آئی ایم ایف کا یہ مطالبہ شریف حکومت پہلے ہی نافذ کر چکی ہے، جس سے پاکستانیوں میں تشویش پائی جاتی ہے اور ان کا کہنا ہے کہ وہ توانائی کے زیادہ بل ادا کرنے سے قاصر ہیں۔

پاکستان کی وزارت خزانہ نے جمعرات کو ہی ایک بیان میں کہا کہ آئی ایم ایف کے ساتھ تمام معاملات کو ''خوشگوار طریقے سے‘‘ طے کر لیا گیا ہے۔ جمعرات کا یہ اعلان آئی ایم ایف کی جانب سے پاکستان کے ساتھ سات بلین ڈالر قرض کے نئے معاہدے کے لیے عملے کی سطح پر معاہدہ کیے جانے کے دو ماہ بعد سامنے آیا ہے۔

پاکستان اس وقت اپنے بدترین معاشی بحرانوں میں سے ایک کا سامنا کر رہا ہے اور شہباز شریف نے امید ظاہر کی ہے کہ ان کا ملک آنے والے سالوں میں غیر ملکی قرضوں پر انحصار کم کرنے میں کامیاب ہو جائے گا۔ اگر آئی ایم ایف کے بورڈ آف ایگزیکٹو ڈائریکٹرز قرض کے اس نئے معاہدے کی منظوری دے دیں تو یہ 37 ماہ پر مشتمل ہو گا۔

ش ر⁄ ع ا (اے پی)