بابر اعظم ٹی ٹوئنٹی میں تیز ترین ہزار رنز بنانے والے کھلاڑی
4 نومبر 2018
متحدہ عرب امارات کی ریاست دبئی کے کرکٹ اسٹیڈیم میں نیوزی لینڈ کے خلاف تیسرے ٹی ٹوئنٹی میچ میں اتوار چار نومبر کو بابر اعظم نے سب سے تیز رفتار ایک ہزار رنز بنانے والے کھلاڑی کا اعزاز حاصل کر لیا۔ انہوں نے یہ ریکارڈ بناتے ہوئے بھارت کے انتہائی کامیاب بیٹسمین ویراٹ کوہلی کا ریکارڈ توڑ ڈالا۔ کوہلی نے ٹی ٹوئنٹی میں اپنے ایک ہزار رنز ستائیس اننگز میں مکمل کیے تھے۔
بابر اعظم چھبیس اننگز میں ایک ہزار رنز بنانے والے پہلے بیٹسمین ہیں۔ اس بڑے سنگ میل کے ساتھ ساتھ انہوں نے اس میچ میں اپنی نصف سینچری بنانے کے بعد اناسی کے انفرادی اسکور پر آؤٹ ہوئے۔ ٹی ٹوئنٹی میں بابر اعظم کا سب سے زیادہ اسکور ستانوے رنز ناٹ آؤٹ ہے۔
انہوں نے یہ سب سے زیادہ اسکور ویسٹ انڈیز کی ٹیم کے خلاف کراچی میں رواں برس دو اپریل کو بنایا تھا۔ متحدہ عرب امارات میں پاکستانی ٹیم آسٹریلیا کو ٹی ٹوئنٹی میں تمام تینوں میچوں میں شکست دینے کے بعد اب نیوزی لینڈ کے خلاف بھی سیریز جیت چکی ہے۔