1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں
مغربی کنارے کا مقبوضہ فلسطینی علاقہ، دو مارچ، دو ہزار اکیس: عبرون کے نواح میں ایک فلسطینی خاتون اور اس کا گھر منہدم کرتی ہوئی اسرائیلی فورسزتصویر: Mussa Qawasma/REUTERS

اسرائیل بین الاقوامی جرائم کا مرتکب، ہیومن رائٹس واچ

27 اپریل 2021

انسانی حقوق کی تنظیم ہیومن رائٹس واچ نے اپنی ایک تازہ لیکن بہت مفصل رپورٹ میں اسرائیل پر الزامات لگائے ہیں کہ وہ اپنی پالسییوں کے ذریعے فلسطینیوں کے ساتھ نسلی امتیاز اور ان کے ہدف بنا کر تعاقب کا مرتکب ہو رہا ہے۔

https://www.dw.com/ur/%D8%A7%D8%B3%D8%B1%D8%A7%D8%A6%DB%8C%D9%84-%D8%A8%DB%8C%D9%86-%D8%A7%D9%84%D8%A7%D9%82%D9%88%D8%A7%D9%85%DB%8C-%D8%AC%D8%B1%D8%A7%D8%A6%D9%85-%DA%A9%D8%A7-%D9%85%D8%B1%D8%AA%DA%A9%D8%A8-%DB%81%D9%88-%D8%B1%DB%81%D8%A7-%DB%81%DB%92-%DB%81%DB%8C%D9%88%D9%85%D9%86-%D8%B1%D8%A7%D8%A6%D9%B9%D8%B3-%D9%88%D8%A7%DA%86/a-57352239

نیو یارک میں قائم اور انسانی حقوق کے لیے بین الاقوامی سطح پر سرگرم اس تنظیم نے آج منگل ستائیس اپریل کو دو سو تیرہ صفحات پر مشتمل اپنی ایک جامع رپورٹ جاری کی۔ اس رپورٹ میں کہا گیا ہے کہ اسرائیل اپنی سرحدوں کے اندر اور اپنے زیر قبضہ علاقوں میں فلسطینیوں کے ساتھ جن رویوں کا مرتکب ہو رہا ہے، وہ بین الاقوامی جرائم کے زمرے میں آتے ہیں۔

اسرائیلی پالیسیاں 'انسانیت کے خلاف جرائم‘

ہیومن رائٹس واچ (ایچ آر ڈبلیو) نے اس رپورٹ میں انسانی حقوق کی کئی دیگر تنظیموں اور مبصرین کی طرح اس رائے کا اظہار کیا ہے کہ اگر اسرائیل میں عرب نسل کے اقلیتی شہریوں اور غزہ پٹی اور مغربی کنارے کے مقامی باشندوں کی مجموعی آبادی کو دیکھا جائے، تو یہ تعداد اسرائیل کی آبادی کا تقریباﹰ نصف بنتی ہے۔

یروشلم: اسرائیل نے فلسطینیوں کے لیے دمشق گیٹ کھول دیا

مگر اسرائیلی ریاست اپنی پالیسیوں کے ساتھ نا صرف اپنے عرب اقلیتی شہریوں بلکہ غزہ پٹی اور مغربی کنارے کے فلسطینیوں کو بھی منظم انداز میں ان بنیادی حقوق سے محروم کرتی جا رہی ہے، جو یہودی شہریوں کو حاصل ہیں۔

Israel | Proteste | Zusammenstöß zwischen Juden und Palästinensern
چوبیس اپریل، دو ہزار اکیس: یروشلم میں پائی جانے والی کشیدگی کے خلاف مغربی کنارے کے مقبوضہ فلسطینی علاقے میں اسرائیل مخالف احتجاج میں شریک فلسطینیوں پر فائر کرتی ہوئی اسرائیلی پولیستصویر: Mussa Qawasma/REUTERS

اسرائیل نے فلسطینیوں کے خلاف جنگی جرائم کی تفتیش مسترد کر دی

ایچ آر ڈبلیو نے سنگین الزامات عائد کرتے ہوئے کہا ہے کہ اسرائیل بین الاقوامی جرائم کے زمرے میں آنے والی جن پالیسیوں پر عمل پیرا ہے، ان کی حیثیت انسانیت کے خلاف جرائم کی ہے۔

ساتھ ہی اس تنظیم نے کہا ہے کہ اس کی اس رپورٹ کا مقصد اسرائیل اور نسلی امتیاز کے دور کی جنوبی افریقی ریاست کا موازنہ نہیں بلکہ وہ یہ تعین کرنا چاہتی ہے کہ آیا مخصوص نوعیت کی اسرائیلی پالیسیوں اور اقدامات کو موجودہ بین الاقوامی قانون کے تحت نسلی امتیاز کا ارتکاب قرار دیا جا سکتا ہے۔

اسرائیل نے رپورٹ مسترد کر دی

اسرائیلی وزرات خارجہ نے دعویٰ کیا ہے کہ ہیومن رائٹس واچ کی یہ رپورٹ 'غلط بھی ہے اور لغو بھی‘ اور یہ کہ یہ تنظیم طویل عرصے سے اسرائیل مخالف ایجنڈے پر کام کر رہی ہے۔ ساتھ ہی اسرائیلی وزارت خارجہ نے اس رپورٹ پر اپنے ردعمل میں یہ بھی کہا کہ انسانی حقوق کے لیے سرگرم یہ گروپ کئی برسوں تک بار بار اسرائیل کا بائیکاٹ کروانے کے لیے کام کرتا رہا ہے۔

امریکا نے فلسطینیوں کے لیے امدادی فنڈ بحال کر دیا

اسرائیل سے تعلقات کی بحالی ’بے پناہ فائدہ مند‘ ہے، پرنس فیصل

اسٹریٹیجک امور کے اسرائیلی وزیر مائیکل بائٹن نے کہا، ''اس رپورٹ کا کسی بھی طور کوئی تعلق انسانی حقوق سے تو ہے ہی نہیں۔ بلکہ یہ ہیومن رائٹس واچ کی ان مسلسل کوششوں کا حصہ ہے، جو وہ اسرائیلی ریاست کے بقا کے حق اور اس کے یہودی شہریوں کو نیچا دکھانے کے لیے کر رہی ہے۔‘‘

فلسطینی صدر کی طرف سے خیرمقدم

ان اسرائیلی دعووں کے برعکس فلسطینی صدر محمود عباس نے اس رپورٹ کا خیر مقدم کیا ہے۔ اس تناظر میں صدر محمود عباس کی طرف سے جاری کردہ ایک بیان میں کہا گیا ہے، ''اس وقت بین الاقوامی برادری کی طرف سے مداخلت کی اشد ضرورت ہے، اس لیے کہ تمام ممالک، ان کے ادارے اور تنظیمیں اس امر کو یقینی بنائیں کہ وہ کسی بھی طرح اور کسی بھی شکل میں ان جنگی جرائم میں نا تو مدد کریں اور نا ہی ان کا حصہ بنیں، جن کا ارتکاب انسانیت اور فلسطین کے خلاف کیا جا رہا ہے۔‘‘

فلسطینی علاقوں میں جنگی جرائم کی تفتیش کا فیصلہ

ہیومن رائٹس واچ کی طرف سے دی گئی مثالیں

ایچ آر ڈبلیو نے اپنی رپورٹ میں نشاندہی کی ہے کہ جس طرح اسرائیل نے فلسطینیوں کی نقل و حرکت پر پابندیاں لگا رکھی ہیں، اور جس طرح 1967ء کی عرب اسرائیلی جنگ کے دوران قبضہ کردہ علاقوں پر فلسطینیوں کی ملکیتی زمینوں کو یہودیوں کی آباد کاری کے لیے ضبط کیا جا رہا ہے، وہ ایسی ریاستی پالیسیوں کی مثالیں ہیں، جو دراصل نسلی امتیاز اور ہدف بنا کر تعاقب کرنے کے جرائم ہیں۔

فلسطینی علاقوں میں ممکنہ اسرائیلی جنگی جرائم: عالمی عدالت میں تحقیقات کی راہ ہموار

اسی رپورٹ کے مطابق، ''پورے اسرائیل اور فلسطینی علاقوں میں، اسرائیلی حکام نے یہ دانستہ کوششیں کی ہیں کہ ان کا فلسطینیوں پر غلبہ قائم رہے۔ اس کے لیے وہ زمین پر قبضے اور آبادی کی ہیئت اور تناسب میں رد و بدل کو اپنے کنٹرول میں رکھتے ہوئے یہودی شہریوں کو فائدہ پہنچانے کے لیے کوشاں ہیں۔‘‘

اس رپورٹ کے آخر میں کہا گیا ہے، ''ان اور دیگر مثالوں سے یہ نتیجہ اخذ کیا جاتا ہے کہ اسرائیلی حکام انسانیت کے خلاف نسلی امتیاز اور تعاقب کے مرتکب ہوئے ہیں۔‘‘ اس نتیجے تک پہنچنے کے لیے ایچ آر ڈبلیو نے ان جرائم کی وہ تعریفیں اور وضاحتیں استعال کیں، جو 1976ء کے نسلی امتیاز کے خلاف بین الاقوامی کنوینشن اور 1998ء میں منظور کردہ قانونِ روم میں کی گئی ہیں۔

اسرائیل: فلسطینی علاقوں میں مزید یہودی بستیوں کی منظوری

مقبوضہ فلسطینی علاقے میں تیار کردہ اسرائیلی شراب متحدہ عرب امارات میں

بین الاقوامی فوجداری عدالت کی طرف سے تفتیش

نیدرلینڈز میں قائم بین الاقوامی فوجداری عدالت (آئی سی سی) کی پراسیکیوٹر کی طرف سے ابھی گزشتہ ماہ ہی کہا گہا تھا کہ وہ فلسطینی علاقوں میں جنگی جرائم کے ارتکاب کی باقاعدہ تفتیش کریں گی۔

ایسا کیا جانا اس عدالت کے ججوں کے اس فیصلے کے بعد ممکن ہو گیا تھا کہ فلسطینی علاقے اس عدالت کی قانونی عمل داری میں آتے ہیں۔

سعودی عرب، امام کعبہ اور اسرائیل سے متعلق بدلتا موقف

دی ہیگ میں انٹرنیشنل کریمینل کورٹ کے اس فیصلے کا فلسطینی خود مختار انتظامیہ نے خیر مقدم کیا تھا مگر اسرائیلی وزیر اعظم بینجمن نیتن یاہو نے اسے ایک 'سامیت دشمن‘ فیصلہ قرار دیتے ہوئے مسترد کر دیا تھا۔ ساتھ ہی نیتن یاہو نے یہ بھی کہا تھا کہ اسرائیل اس عدالت کے اختیارات اور اس کی عمل داری کو تسلیم نہیں کرتا۔

م م / ب ج (روئٹرز، اے ایف پی)

ڈی ڈبلیو کی اہم ترین رپورٹ سیکشن پر جائیں

ڈی ڈبلیو کی اہم ترین رپورٹ

USA | Abstimmung im UN-Sicherheitsrat über die Haiti-Resolution

پاکستانی 'دہشت گردوں‘ سے متعلق چین کا ’معیار دوہرا‘، بھارت

ڈی ڈبلیو کی مزید رپورٹیں سیکشن پر جائیں
ہوم پیج پر جائیں