سوات میں سمر فیسٹیول: سیاحت کا فروغ

پاکستان فوج اور خیبر پختونخوا حکومت کی جانب سے سوات سمر فیسٹیول سوات کے سیاحتی مقامات کالام، اوشو فارسٹ گراؤنڈ اور مہوڈنڈ میں منعقد کیا جائے گا۔ تین روزہ سوات سمر فیسٹول میں پیرا گلائڈنگ، نیزہ بازی، جیپ ریلی، پتنگ بازی، کھانے پینے کے اسٹالز، روایتی موسیقی کے پروگراموں اور موٹر سائیکل ریلی کے ساتھ ساتھ ہر رات آتش بازی کا مظاہرہ کیا جائے گا۔ سوات میں آئی ایس پی آر کے ترجمان کرنل ذیشان کا کہنا ہے کہ سوات سمر فیسٹول کے لئے تمام تیاریاں مکمل کر لی گئی ہے۔ انہوں نے بتایا:’’گزشتہ سال مختلف میلوں اور فیسٹیول کے انعقاد کے بعد لاکھوں کی تعداد میں سیاحوں نے سوات کا رخ کیا تھا۔ اس بار سوات سمر فیسٹول کے لئے سیاح پہلے ہی سے سوات آنا شروع ہو گئے ہیں اور توقع کی جا رہی ہے کہ اس سال کثیر تعداد میں سیاحوں کی آمد گزشتہ تمام سیاحتی ریکارڈ توڑ ڈالے گی۔‘‘

سوات سمر فیسٹول کے لئے سوات کے سیاحتی اور پر فضا مقامات کا انتخاب کیا گیا ہے۔ مہوڈنڈ، اوشو فارسٹ گراؤنڈ اور کالام جیسی جنت نظیر وادیوں میں سیاحوں نے پہلے سے ہی ڈیرے ڈال دیے ہیں۔ ساہیوال سے اپنی فیملی کے ساتھ آئی ہوئی خاتون مسز داؤد نے کہا کہ سوات بہت ہی خوبصورت جگہ ہے، یہاں بار بار آنے کو دل کرتا ہے۔ ان کا مزید کہنا تھا:’’یہاں پر آ کے بہت اچھا لگا، یہاں پر ڈرنے والی کوئی بات نہیں، نہ ہی یہاں پر طالبان ہیں، نہ ہی کوئی دہشت گردی، سب لوگوں کو سوات آنا چاہئے۔‘‘

سوات سمر فیسٹول 20 جون سے 23 جون تک جاری رہے گا۔ اس دوران مختلف کھیلوں کے مقابلوں کے ساتھ ساتھ ہینڈی کرافٹس، گارمنٹس اور دیگر مصنوعات کے اسٹالز بھی لگائے جائیں گے، جہاں پر سیاح لطف اندوز ہونے کے ساتھ ساتھ اپنے لیے خریداری بھی کریں گے۔ سمر فیسٹول میں میوزک نائٹس کا بھی اہتمام کیا جائے گا، جن میں پاکستان کے معروف گلوکار شرکت کریں گے۔

ملک بھر میں گرمی کی شدید لہر کی وجہ سے طول وعرض سے سیاحوں نے سوات کے سیاحتی مقامات کا رخ کرنا شروع کر دیا ہے جبکہ ہوٹلوں میں کمروں کی ایڈوانس بکنگ بھی جاری ہے۔ مہوڈنڈ کے مقام پر ٹینٹ ویلج بھی لگایا گیا ہے، جہاں سیاح حسین نظاروں سے لطف اندوز ہو رہے ہیں۔ قیام امن کے بعد گزشتہ سال لاکھوں کی تعداد میں سیاحوں نے سوات آکر گزشتہ بیس سالہ سیاحتی ریکاڑد توڑ دیا تھا۔ اس سال بھی امن و امان کی بہتر صورت حال اور سمر فیسٹیول کے انعقاد سے توقع کی جا رہی ہے کہ ملکی و غیر ملکی سیاح کثیر تعداد میں سوات آئیں گے۔

رپورٹ: عدنان باچا، سوات

ادارت: امجد علی