په ټایلنډ کې د ریل گاډي ټکر؛ تر ۲۰ ډېر کسان مړه سوي

په ټالنډ کې په څه ناڅه ۲۰۰ کسانو ډک یوه ریلگاډي په ډیر سرعت سره له یوه چپه سوي کرین سره ټکر کړی دی.

لکه څنگه چې ټایلنډي رسنیو د ژغورونکې عملې او چارواکو په حواله رپوټ ورکړی دی، په ځايي وخت له غرمې مخکې ۲۲ جسدونه راایستل سوي او څه ناڅه ۷۰ کسان نور سخت زخمیان سوي دي.

 دغه پیښه نن سهار له بنکاک څخه څه ناڅه ۲۳۰ کیلومتره لیري، د ناخون راچاسیما ولايت د سیشیو په ناحیه کې رامنځته سوې ده.

د «بنکاک پوست» په نوم ورځپاڼې لیکلي دي چې اوسپنیز کرین چې د پټلیو د جوړولو له پاره کار ورڅخه اخیستل کیدی، په ناڅاپي توگه او فقط یو څو ثانیې مخکې له هغه چې ریلگاډی ورسره ټکر وکړي، راچپه سو.

 د پیښې شرایط لا روښانه نه دي

ویل کیږي چې ریلگاډي په ډیر سرعت سره له کرین سره ټکر وکړ. د هغه ډیر واگونونه له پټلیو واوښتل، مسافر په ویجاړیو کې بند پاته سول. همدارنگه یوه اورلگیدنه هم رامنځته سوه.

نورې رسنۍ بیا رپوټ ورکوي چې کرین د حرکت په حال کې ریلگاډي باندې رالویدلی دی. د پیښې دقیق جزیات لا روښانه نه دي.

د ژغورونکې ډیری ټیمونه د پیښې په ځای کې حاضر سوي، تر څو له قربانیانو سره مرسته وکړي او په ریلگاډي کې بند پاته سوي زخمیان وژغوري. د څه د پاسه ۲۰ زخمیانو حالت حساس دی. د نورو مړو د زیاتیدو بیره هم موجوده ده.

په ریلگاډي کې ۱۹۵ کسان سپاره ول

د ریلگاډو د دولتي شبکې (SRT) په حواله دغه ریلگاډی له دریو واگونونو سره له پایتخت بنکاک څخه د ټایلنډ په شمال ختیځ کې، اوبون کچاتاني ته روان و. ویل کیږي چې په ریلگاډي کې ۱۹۵ کسان سپاره ول چې په هغو کې مسافر او پرسونل هم شاملیږي.

نوموړی کرین د (HGV) په نوم هغې سترې ساختمانې پروژې یوه برخه و چې په راتلونکې کې یې باید ټایلنډ د لاوس له لارې له چین سره وصل کړی وای. دا چې دغه کرین ولې راچپه سو، په اړه یې پلټنې روانې دي.