د تعرفو کمولو له پاره د هند او امریکا موقتي سوداګریز تړون

هند موافقه کړې ده چې له روسیې څخه به د تیلو واردات بندوي، او امریکا به پر هندي محصولاتو تعرفې کموي. دواړو هیوادونو دغه تړون د «مشترکو منافعو» پر بنسټ د یوه پراخ سوداګریز تړون په مسیر کې مهم ګام بللی دی، په هر صورت داسې کومې معاملې ته نهایي شکل ورکول به لا زیاتو خبرو اترو ته اړتیا ولري.

د دې موقتي تړون له مخې به هند پر امریکایي صنعتي توکو او یو شمیر کرنیزو محصولاتو ګمرکي تعرفې یا کمې او یا هم په بشپړ ډول ختموي، په داسې حال کې چې هند په پنځو کلونو کې د ۵۰۰ میلیارده ډالرو په ارزښت د امریکایي تولیداتو د پيرلو ژمنه کړې ده.

د هند لومړي وزیر نریندر مودي له دونالد ترمپ څخه په مننې سره دغه تړون د ژورو دوه اړخیزو مناسباتو نښه بللې ده. خو د هند اپوزیسیون بیا ویلي دي چې دغه تړون د امریکا په ګټه دی او د هند کرهڼې په څیر حساسو سکتورونو ته زیان رسولی شي.

بل لوري ته د هند د سوداګرۍ وزیر پیوش ګوئل وایي چې دغه تړون د لبنیاتو او مهمو کرنیزو محصولاتو حفاظت او ساتنه کوي. د هغه په خبره له دې تړون سره به د امریکا بازارونه د هندي صادرونکو له پاره پرانیستل شي چې د سلګونو زره نوو کارځایونو د رامنځته کیدو سبب ګرځي.

په دې وروستیو کې هند له اروپايي اتحادیې سره د آزاد تجارت تړون هم لاسلیک کړی دی، په داسې حال کې چې له عمان هیواد سره د اقتصادي مشارکت او له نیوزیلنډ سره پر ازادې سوداګرۍ د موافقتنامې چارې یې هم بشپړې شوې دي.