د افغانستان د ماموريت په اړه د ترمپ پر څرګندونو نيوکه
۱۴۰۴ بهمن ۶, دوشنبه
د آلمان د دفاع وزير بوريس پيستوريوس د آی آر ډي تلويزيوني شبکې د «کارن ميوسکا» په خپرونه کي د امریکا د ولسمشر دونالد ترمپ څخه وغوښتل چي د خپلو څرګندونو په اړه بخښنه وغواړي. هغه وويل: «دا [بخښنه] به د شرافت، درناوي او بصيرت نخښه وي.»
د آلمان د دفاع وزير وويل: «خو موږ ټول پوهيږو چي د امریکا ولسمشر څرنګه چلند کوي.» هغه زياته کړه چي د افغانستان په ماموريت کي ټول د متحده ايالاتو ترڅنګ وجنګېدل: «د متحدينو د وژل کيدو په اړه په دغه شان خبري کول، په ساده ډول نامناسبه او بې احترامي ده. ټول هلته ول او د امریکا ترڅنګ ولاړ ول. دا چي نن د دې خلاف ادعا وسي، عملاً درسته نه ده.»
په افغانستان کي د ناټو په چوکاټ کي ماموريت په جريان کي د آلمان د پوځ ۵۹ سرتيري ووژل سول.
دونالد ترمپ په دې وروستيو کي پر ناټو نيوکه کړې ده چي د افغانستان په جګړه کي د جګړې لومړۍ کرښو ته له تګه ډډه کړې وه.
پيستوريس وويل چي په راتلونکي فرصت کي به دا موضوع له خپل امريکايي سيال پيټ هيګست، سره مطرح کړي.
د آلمان د دفاع وزير، په ګرينلند کي د ناټو د اکتشافي ماموريت پر سر د امریکا متحده ايالاتو لنډمهاله ګواښ ته په اشارې سره په واشنګټن کي د يوې غلط فهمي په اړه خبره وکړه.
هغه په دې باور دی چي اروپا بايد ځان دې ته چمتو کړي چي نور د تيرو ۷۰ کالو په شان پر متحده ايالاتو تکيه و نه کړي.
پيستوريوس تر ۲۰۲۹م کاله پوري د آلمان وسله وال پوځ د جنګي چمتووالي په برخه کي پر «ډېر ښه مسير» ويني.
هغه زياته کړه چي د ترمپ هري تبصرې ته بايد غبرګون و نه ښودل سي؛ بلکي پام بايد نورو مهمو مسائلو ته واوړي.