ترمپ وايي ایران ورسره منلې چې اټومي وسلې به نه لري
۱۴۰۵ خرداد ۱۰, یکشنبه
د امریکا متحده ایالاتو ولسمشر دونالد ټرمپ د فاکس نیوز په نامه له امریکایی تلویزیون سره په مرکه کې وویل: «یوازینی تضمین چې زه یې باید ولرم دا دی چې اټومي وسلې به نه وي. هغوی له دې سره موافقه کړې ده، او دا ډېره په زړه پورې وه.»
نوموړي دغه څرګندونې د فاکس نیوز تلویزیون له لارا ټرمپ خپرونې سره په مرکه کې کړي دي. لارا ټرمپ د ولسمشر نږور ده چې په فاکس نیوز تلویزیون کې د خپرونې کوربتوب هم کوي.
د راپورونو له مخې، ټرمپ د ایران سره د یوې لومړنۍ هوکړې له لاسلیکولو ډډه کړې وه؛ هغه هوکړه چې د نورو موضوعاتو ترڅنګ به یې د ایران د اټومي پروګرام په اړه د خبرو نوې لړۍ پیل کړې وای.
ټرمپ په وار وار ویلي چې د ایران پر وړاندې د امریکا متحده ایالاتو د جګړې اصلي موخه دا ده چې ډاډ ترلاسه شي دغه هېواد یعنې ایران به هېڅکله اټومي وسله ونه لري.
خو تهران د هغې جګړې په ترڅ کې چې اوس نیږدې درې میاشتې کېږي دوام لري، د وسلې جوړولو کچې اټومي موادو او غني شویو یورانیمو له سپارلو ډډه کړې ده.